कालिकोट : जिल्लाको सदरमुकाम मान्म स्थित एकीकृत भवन राखिएका कोरोना संक्रमितलाई खानेपानीको सुविधा नहुँदा शौचालयमा राखिएको पानी खाने गरेको बताएका छन् । उनीहरुले एकीकृत भवनको छतमा राखिएको दुई वटा ट्यांकीको पानी सकिएपछि आफूहरुले तिर्खा लागेको बेलामा शौचालयको पानी खान बाध्य भएको बताएका हुन् ।
शौचालयमा पनि प्रयाप्त पानी नहुँदा दिशा भरिएको उनले बताए। 'हामीलाई अहिलेसम्म कुनै समस्या छैन। कोरोना लाग्यो भनेकाले के पो हुन्छ भनेर डर मात्र छ । यहाँ डाक्डर सोधपुछ गर्नै आउँदैनन् । भवनमै राखेका स्वास्थ्यकर्मीहरुले सामान्य सोधपुछ मात्र गर्छन्', उनले भने, 'बरु तिलागुफामा क्वारेन्टाइनमा बस्दा सुविधा थियो । सदरमुकाममा खाँदा हामीलाई अन्य रोग लाग्छ कि भन्ने डर लाग्न थालेको छ ।'
अर्का कोरोना संक्रमित युवाले आफूलाई परेको समस्या शुभकालिका गाँउपालिका अध्यक्ष खडानन्द चौलागाईलाई फोन गरेर सुनाउँदा जसरी भए पनि त्यहीं बस्नुपर्ने प्रतिक्रिया दिएको बताए । उनले भने, 'जिल्लाका प्रमुख जिल्ला अधिकारी, जिल्ला प्रहरी प्रमुख, राजनीतिक दलका नेता, जनप्रतिनिधि कसैले पनि के छ अवस्था भनेर सोधपुछ नै गर्दैनन् । एम्बुलेन्समा ल्याएर यो हलमा हुलिदिए । कसैले पनि हाम्रो विषयमा चासो दिएनन् ।'
कोरोना संक्रमितको उपचारमा खटिएका स्वास्थ्यकर्मी बिरेन्द्र केसीले आइसोलेसनको व्यवस्थापन र बिरामीको मागले हैरान भएको बताए । उनले भने, 'खानेपानी बिरामी र आफूहरुको ट्यांकी एउटै छ । बिरामीले त्यही ट्यांकीमा सफा गर्ने पानी मिलाउँछन्। त्यही पानी हामीहरुले खानुपर्छ । त्यो पनि प्रयाप्त पानी आउँदैन् । हामीले बिहान दुई वटा बाल्टी बाहिरबाट भरेर ल्याएर प्रयोग गरेका छौँ ।'
स्वास्थ्यकर्मीले लगाउने पिपिई सफा गर्न पनि पानी नपुग्ने उनले बताए । 'भवनको गेट खुला हुन्छ । सुरक्षाकर्मी टाढा बस्छन् । बिरामी भागे भने कसले जिम्मा लिने । बिरामीहरुले विभिन्न अनावश्यक माग राखेर हैरान बनाउन थाले । आफूहरुको बस्ने कोठामा कोरोना संक्रमित नआउ भन्दा अटेर गरी भित्र पस्छन्', उनले भने । भवन भित्रै सुरक्षा र प्रयाप्त खानेपानीको व्यवस्था तत्काल गर्नुपर्ने उनले बताए ।
प्रमूख जिल्ला अधिकारी कृष्णचन्द्र पौडेलले तत्काल व्यवस्थापन गरेकाले आइसोलेसनमा देखिएको समस्या तत्काल समाधान गरिने बताए । उनले भने, 'सबै सरोकारवाला निकायसँग छलफल गरी त्यहाँ देखिएका समस्या समाधान गर्छौं । सुरुवातको चरण भएकाले केही व्यवस्थापन गर्न समय लागेको हो । सबै समसयाको समाधान हुन्छ ।'
आइसोलेसनमा बिरामीको अवस्था बुझ्न र उनीहरुलाई परामर्श दिनका लागि डाक्टरहरु पठाउने उनले बताए । स्वास्थ्य सेवा कार्यालयका निमित्त प्रमूख भिष्म पोख्रेलले फोन उठाएनन् । कार्यालयका सूचना अधिकारी कटकबहादुर महतले आइसोलेसनमा रहेका बिरामीको कुरा डाक्टरलाई सुनाइदिने बताए ।
प्रतिक्रिया दिनुहोस !
