कपिलवस्तु : जिल्लामा निर्माण गरिएका आइसोलेसन वार्डहरु मापदण्ड विपरितका छन् । कोरोना संक्रमण भएका सर्वसाधारणको सघन उपचारका लागि निर्माण गरिएका आइसोलेसन वार्डमा पोषिलो खाने कुरा, बसाइ व्यवस्थापनलगायतका अति आवश्यक सेवा प्रवाह हुन सकेको छैन ।
आइसोलेसन वार्डको मापदण्ड अनुसारका बेड पनि राखिएका छैनन् । २४ घण्टा स्वास्थ्यकर्मी, मेडिकल अफिसरको ड्युटीको प्रबन्ध पनि हुन सकेको छैन । जिल्लाका विभिन्न पालिकाले ५ सय बढी आइसोलेसन वार्ड स्थापना गरेको बताएका छन् । तर केही वार्डबाहेक अधिकांश वार्ड क्वारेन्टाइनसरह नै छन् ।
अहिले निर्माण गरिएका आइसोलेसन वार्डमा कोरोना संक्रमितलाई कुनै जटिल समस्या देखिइ हाल्यो भने उनीहरुलाई थप उपचार गर्न जिल्लामा कोरोना विशेष अस्पताल स्थापना हुन सकेको छैन ।
जिल्लाका दक्षिणी क्षेत्रका गाउँपालिकामा कोरोना विशेष अस्पताल बनाउने खालका भवन उपलब्ध नभएका कारण सदरमुकाम तौलिहवामामा तत्काल कोरोना विशेष अस्पताल निर्माण गरिनुपर्ने यशोधरा गाउँपालिकाका प्रमुख गिरिजेश कुमार पाण्डेयले बताए ।
मुलुकमै संक्रमितको संख्या बढी भएको जिल्लामा कोरोना संक्रमण रोकथामका लागि गर्नुपर्ने प्रयास प्रशस्त मात्रामा हुन नसकेको तौलिहवाका अगुवा युवा प्रकाश घिमिरेले बताए ।
प्रदेश सरकार र केन्द्र सरकारले आवश्यक उपकरणहरु तत्काल उपलब्ध गराएर कोरोना विशेष अस्पताल निर्माण गर्नुपर्छ । जिल्लामा रहेका ३ सय २ जना संक्रमितमा कुनै जटिल समस्या देखिए उपचार नै नपाएर मर्ने अवस्था नहोस्, अगुवा युवा घिमिरेले भने, 'क्वारेन्टाइन व्यवस्थापनसम्म जिल्लाका पालिका सक्षम थिए तर आइसोलेसन वार्ड निर्माणका लागि प्रदेश र केन्द्र सरकारको अहयोग जरुरी छ, होइन भने क्वारेन्टाइनको अव्यवस्थित व्यवस्थापन जस्तै हालत आइसोलेसन वार्डको हुनसक्छ, यसतर्फ समयमै सोच्नुपर्छ।'
प्रतिक्रिया दिनुहोस !
