सुनसान रारा (फोटो फिचर )

मुगु  : चैत्रदेखि असारसम्म रारा घुम्ने उपयुक्त समय हो । कोरोना भाइरस संक्रमण रोकथाम तथा नियन्त्रणका लागि सरकारले चैत्र ११ गते लक डाउन लागु गरेपछि योपटक रारा आउनेको संख्या शुन्य भएको छ । 

सडक यातायात  पुगेपछि केही वर्ष यताबाट चैत्र महिनादेखि असारसम्म रारा घुम्न आउने आन्तरिक पर्यटकको संख्या निकै बढेको थियो । लक डाउन लागु गरेपछि रारा क्षेत्र सुनसान रहेको छ भने आसपासमा रहेका होटल बन्द छन् ।

  
अन्य वर्ष यो समयमा तालको किनार तथा अन्य तालका आसपासका रमरणीय क्षेत्रमा फोटो खिचाउन उभिएका भिडका भिड मानिस देखिन्थे । लक डाउनका कारण यसपालि चैत्रबाट एक जना पनि आएका छैनन् । सबै होटल बन्द गरेर ब्यवसाही आ-आफ्नो घर गइसकेका छन् । बाटोभरि घोडा सफारी र तालमा डुङ्गा सयर गर्ने मानिसको अभावमा रारा ताल मौन छ । ताल वरिपरि रहेका घाँसे मैदान सुनसान छन् । माझ घट्ट, सल्लेरी, हुटु र लामाचौरका होटल सबै बन्द गरिएको होटल व्यवसाही चक्र रोकाया बताउँछन् ।

 
रारा आउने पर्यटकलाई घोडा सफारी गराउन  मुर्मा, झयारी, टोप्ला गाँउका झण्डै सयौ जनाले घोडा ब्यवसाय गरेका थिए । पर्यटक नआएपछि दैनिक २ हजारदेखि ३ हजारसम्म आम्दानी गर्ने घोडा ब्यवसायसमेत चौपट भएको छ । दानपानी  गर्ने खर्चसमेत नभएपछि घोडा पाटन क्षेत्र छोडेको ब्यवसाही अर्जन राजवलले बताए ।
 
रारा घुम्ने सिजनमा अघिल्ला वर्ष दिनहुँ २ सय देखि ३ सयसम्म आन्तिरिक पर्यटक आउने गरेका थिए । लक डाउन लागु हुनुभन्दा पहिले रारा आउनका लागि सयौँ जनाले होटल बुक गराइसकेका थिए । कोरोना भाइरस नियन्त्रण नहुन्जेल रारा सुनसान हुने होटल डाँफेका म्यानेजर बलि शाहीले बताए ।