कर्णालीमा थपिए ११४ जना संक्रमित : संक्रमण नभएकालाई पनि कोरोना पुष्टि

दैलेख : कर्णाली प्रदेशमा एकै दिन ११४ जनामा कोरोना संक्रमण देखिएको छ । कर्णाली प्रदेश अस्पताल सुर्खेतस्थित पशुपंक्षी रोग अन्वेषण प्रयोगशाला र कर्णाली स्वास्थ्य विज्ञान प्रतिष्ठान जुम्लास्थित प्रयोगशालामा गरिएको परीक्षणमा थप ११४ जनामा कोरोना संक्रमण पुष्टि भएको सामाजिक विकास मन्त्रालय अन्तरगर्तको स्वास्थ्य सेवा महाशाखाले जनाएको छ । 

अब योसहित कर्णालीमा संक्रमितको संख्या ३ सय ८९ पुगेको छ । दैलेखका १ सय १३ जना र मुगुका १ जनाको कोरोना संक्रमण पुष्टि भएको स्वास्थ्य सेवा महाशाखाका प्रमुख डा. लक्ष्मीनारायण तिवारीले जनाएका छन् । डा. तिवारीका अनुसार दैलेखको नारायण नगरपालिकाका मात्रै १ सय ८ जनामा कोरोना संक्रमण देखिएको हो । 

दैलेखको नारायण नगरपालिका वडा नम्बर १ का १ जना, वडा नम्बर २ का २१ जना, वडा नम्बर ३ का १५ जना, वडा नम्बर ४ का २८ जना, वडा नम्बर ५ का ६ जना, वडा नम्बर ६ का १४ जना, वडा नम्बर ९ का ३ जना,  वडा नम्बर १० का १० जना,  वडा नम्बर ११ का १० जनामा कोरोना संक्रमण देखिएको छ । 

त्यसैगरी नौमूले गाउँपालिका-१ का २ जना, वडा नम्बर २ का ३ जनामा कोरोना संक्रमण पुष्टि भएको हो । यस्तै खत्याड गाउँपालिकाका एकजनामा कोरोना संक्रमण पुष्टि भएको छ । योसँगै दैलेखमा कोरोना संक्रतिको संख्या २ सय १७ पुगेको छ। कोरोनाका कारण एकजनाको मृत्यु भइसकेको छ ।   

कोरोना संक्रमण नभएकालाई कोरोना पुष्टि

सामाजिक विकास मन्त्रालयअन्तरगर्तको स्वास्थ्य सेवा महाशाखाले गत सोमबार बनगाड कुपिण्डे नगरपालिका-३ सल्यान निवासी १७ र १९ वर्षीय पुरुष र दैलेखको चामुण्डाविन्द्रासैनी नगरपालिका ७ का ४५ वर्षीय पुरुषमा कोरोना संक्रमण पुष्टि गर्‍यो । तर, बिहीबार उनीहरुमा कोरोना संक्रमण नदेखिएको स्वास्थ्य सेवा महाशाखाले जनाएको छ । ती ३ जनामा भुलबस रिपोटिङ भएको महाशाखाले जनाएको छ।