राजविराज : सप्तरीको बलान बिहुल गाउँपालिकामा शनिबार दुई वर्षीया बालिकासहित सातजनामा कोरोना संक्रमण पुष्टि भएको छ । दुई वर्षीया बालिकासहित आएका उनका बुवाआमामा पनि संक्रमण देखिएको छ ।
विपी कोइराला स्वास्थ्य विज्ञान प्रतिष्ठान धरानमा गरिएको परीक्षणअनुसार बलान बिहुल गाउँपालिका–५ रामनगरका एक बालिका, एक महिला र पाँच पुरुषमा कोरोना संक्रमण पुष्टि भएको स्वास्थ्य कार्यालय, सप्तरीले जनाएको छ । स्वास्थ्य तथा जनसङ्ख्या मन्त्रालयले सार्वजनिक गर्ने तयारी गरिरहेको छ ।
क्वारेन्टाइनका इन्चार्ज धर्मनाथ यादवका अनुसार संक्रमित हुनेको उमेर २, २७, ३५, ३६, ३७, ४० र ४० वर्ष छ । बलान बिहुल गाउँपालिका–६ स्थित जगदम्बा जगरैता मावि सेहरा रौतहटको क्वारेन्टाइनमा बसेका उनीहरुसहित १ सय ३३ जनाको स्वाब बुधबार पिसिआर परीक्षणका लागि संकलन गरिएको थियो ।
भारतीय सीमासँग जोडिएको सप्तरी जिल्लाको सबैभन्दा पश्चिम–दक्षिण रहेको बलान बिहुल गाउँपालिकामा योसमेत संक्रमितको संख्या ११ पुगेको छ । संक्रमित सात जनामध्ये एक जना भारतको दिल्लीबाट र ६ जना भारतको हरियाणाबाट जेठको दोस्रो साता आएका उनीहरुकै गाउँका अशोककुमार यादवले जानकारी दिए । संक्रमित सबैलाई राजविराज २ स्थित साईकृष्णा मेडिकल कलेज एण्ड हस्पिटलस्थित आइसोलेशन सेन्टरमा ल्याउने तयारी भइरहेको छ ।
सप्तरी जिल्लामा हालसम्म बोदेबसाइन नगरपालिकाको सबैभन्दा बढी २० जना, राजगढ गाउँपालिकाको १३, डाक्नेश्वरी नगरपालिकाको १२, बलान बिहुल गाउँपालिकाको ११, हनुमाननगर कंकालिनी नगरपालिकाको ६, राजविराज नगरपालिका र छिन्नमस्ता गाउँपालिकाको ५-५, जना संक्रमित भएका छन् । खडक, सुरुङ्गा र शम्भुनाथ नगरपालिका तथा विष्णुपुर र तिरहुत गाउँपालिकाका १-१ जना कोरोना संक्रमित पुष्टि भएको स्वास्थ्य कार्यालय सप्तरीका निमित्त प्रमुख दुनियालाल यादवले बताए । संक्रमित पुष्टि भएकामा ४ महिला र ६७ पुरुष छन् ।
सप्तरीमा संक्रमित हुनेको सङ्ख्या ७७ पुगेको छ । १ जना डिस्चार्ज भएका छन् ।
प्रतिक्रिया दिनुहोस !
