परासी : पश्चिम नवलपरासीमा भारतबाट आउनेको संख्या घट्दो छ । कोभिड–१९ का कारण भारतबाट आउनेको संख्या हप्ता दिनअघिसम्म बढ्दो थियो । अहिले त्यो क्रम घट्दो रहेको प्रमुख जिल्ला अधिकारी सागरमणि पाठकले बताए ।
भारतमा लडकडाउनपछि पनि केही समय नेपाली ठूलो संख्यामा नेपाल भित्रिएका थिएनन् । तर महिना दिनअघिबाट भने एकाएक संख्यामा वृद्धि भएको थियो । हप्ता दिनअघि दैनिकजसो १ सय देखि डेढ सयसम्म जिल्ला भित्रिएका थिए । तर अहिले भने संख्या घट्दो रहेको प्रजिअ पाठकको भनाइ छ ।
भारतमा लकडाउन केही खुकुलो भएको र काम गर्न जाने अब उतै बस्ने मनसाय बनाएका कारण पनि संख्या घट्न थालेको हुन सक्ने प्रजिअ पाठकको बुझाइ छ । हप्ता दिनको अवधिमा करिब १ सय जना मात्र जिल्ला भित्रिएका छन् । दुई दिनअघि ३० जना भित्रिएकोमा शनिबार १८ जना भित्रिएका छन् । भारतबाट आएका सबैलाई स्थानीय तहका क्वारेन्टाइनमा राख्ने गरिएको छ । अहिलेसम्म जिल्लामा ३ हजारको हाराहारीमा भारतबाट जिल्ला भित्रिएका छन् ।
भारतबाट आएका २५ सय ४७ जना क्वारेन्टाइनमा बसेका छन् । जसमध्ये १६ सय ७८ जना क्वारेन्टाइनको बसाइपछि घर गएको स्वास्थ्य कार्यालयका प्रमुख गौरव ढकालले जानकारी दिए । शनिबारसम्म क्वारेन्टाइनमा बस्नेको संख्या ८ सय ६९ छ । जिल्लामा कोरोना संक्रमितको संख्या १९ पुगेको छ ।
प्रतिक्रिया दिनुहोस !
