कालिकोट : जिल्लाको तिलागुफा नगरपालिका र नरहरिनाथ गाउँपालिकालाई क्वारेन्टाइन व्यवस्थापनका लागि सामाग्री हस्तान्तरण गरिएको छ । विश्वव्यापी रुपमा फैलिएको कोरोना भाइरस कोभिड १९ को संक्रमण फैलिन नदिनका लागि स्थानीय तहले बनाएका क्वारेन्टाइनको व्यवस्थापनका लागि सेभ द चिल्ड्रेन र भिडिसेफ नेपालको साझेदारीका युवा शसक्तीकरण बुलगारी परियोजनामार्फत सामाग्रीहरू हस्तान्तरण गरिएको हो ।
जिल्लाका ९ वटै स्थानीय तहमा ३ हजार २ सय २२ जना भारतबाट आएका मानिसहरु क्वारेन्टाइनमा रहेका छन् । नरहरीनाथ गाँउपालिकामा २ सय ६५ जना र तिलागुफा नगरपालिकामा ४ सय ६१ जना मानिसहरु क्वारेन्टाइनमा रहेका छन् । सामुदायिक विद्यालय र कतिपय खुला ठाँउमा पालमुनि रहेका मानिसको व्यवस्थापन गर्न सकस छ । भिडिसेफ नेपालका व्यवस्थापक राजेन्द्र सहकारीले भने, 'क्वारेन्टाइनमा रहेका मानिसहरुको स्वास्थ्यमा थप समस्या नहोस् भनेर सरसफाइका लागि ती सामागग्रीहरु सहयोग गरिएको हो । यसअघि हामीले ती स्थानीय तहलाई सिरक, डस्नासहितका सामाग्रीहरु पनि सहयोग गरेका थियौँ ।'
प्रतिक्रिया दिनुहोस !
