कालिकोटमा थपिए ३ जना कोरोना संक्रमित

कालिकोट : जिल्लामा थप तीन जनामा कोरोनाको पुष्टि भएको छ । जिल्लाको खाँडाचक्र नगरपालिका वडा नं. ९ का ३० वर्षीय पुरुष, वडा नं. १० का २४ वर्षीय पुरुष र महाँवै गाँउपालिका वडा नं ५६ वर्षीया पुरुषमा कोरोनाको पुष्टि भएको हो । 
    

जिल्लाबाट स्वाब संकलन गरी कर्णाली स्वास्थ्य विज्ञान प्रतिष्ठान जुम्लामा पिसिआर जाँच गरिएका थप तीन जनामा कोरोना पुष्टि भएको हो । यसअघि जिल्लाको महाबै र शुभकालिका गाँउपालिकाका २५ जना र एक जना बाजुराका गरी २६ जना कोरोना पुष्टि भएको थियो । उनीहरुलाई जिल्ला सदरमुकाममा रहेको आइसोलेशनमा राखिएको छ ।  
    
स्वास्थ्य सेवा कार्यालयका अनुसार जिल्लाका ९ वटै स्थानीय तहमा ३ हजार २ सय २२ मानिसहरु क्वारेन्टाइनमा राखिएका छन् । हालसम्म १ हजार ६ सय ७ जनाको मात्र स्वाब संकलन गरिएको छ । स्वाब संकलन गरिएका झण्डै एक सय जनाको रिपोर्ट आउनै बाँकी छ । 

परीक्षण गरिएका मध्ये जिल्लाका चार वटा स्थानीय तहमा कोरोना पुष्टि भएपछि गाँउ-गाँउमा कोरोनाको त्रास बढेको छ । ग्रामीण स्तरका अव्यवस्थित क्वारेन्टाइनमा राखिएका मानिसमा पनि कोरोना पुष्टि भएपछि धेरै मानिसमा कोरोना संक्रमण फैलिएको आशंका गरिएको छ ।