बागलुङ : जिल्लामा कोरोना संक्रमितको संख्या बढ्दै गएपछि थप संक्रमितलाई धौलागिरी क्याम्पसको कक्षा कोठामा राखिएको छ । गण्डकी प्रदेशले कोरोना अस्पतालको रुपमा सूचीकृत गरेको धौलागिरी अस्पतालमा निर्माण गरिएको २४ बेडको आइसोलेसन भरिएपछि प्रीआइसोलेसनको रुपमा धौलागिरी क्याम्पसको कक्षा कोठा प्रयोगमा ल्याइएको हो ।
‘हामीसँग ५ आइसोलन खाली त थियो तर एकै दिन १० जनामा कोरोना संक्रमण देखिएकाले विकल्प खोज्नुपर्ने बाध्यात्मक अवस्था आयो,’ डा.पोखरेलले भने, ‘अस्पतालमा जटिल समस्या देखा पर्दाका बखत पाँच बेडको आइसोलेसन वैकल्पिक रुपमा राखेका छाँै।’ कोही संक्रमितमा स्वास्थ्य समस्या देखिए खाली रहेका बेडमा ल्याए। उपचार गरिने उनले बताए ।
आइसोलेसनमा राखिएकाहरुको स्वास्थ्य हेरचाह धौलागिरी अस्पताल र बागलुङ नगरपालिकाका स्वास्थ्यकर्मीले आलोपालो गर्नेछन् भने खानाको व्यवस्था बागलुङ नगरपालिकाले गरेको छ । क्याम्पस परिसरमा सुरक्षा रेखदेखको जिम्मा भने नेपाली सेनालाई दिइएको छ ।
बागलुङ जिल्लामा अहिलेसम्म २९ जनामा कोरोना संक्रमण पुष्टि भएको छ । जसमध्ये शुरुवाति संक्रमण पुष्टि भएका दुई जना निको भएर घर फर्किसकेका छन् । अन्य २७ जना उपचाररत छन् । सबै भारतबाट आएका हुन् । अहिले पनि बागलुङका विभिन्न स्थानीय तहमा भारतबाट आएका १६ सय ४३ जना क्वारेन्टाइनमा छन् । उनीहरुमध्ये केहीको पीसीआर परीक्षणका लागि स्वाब संकलन गरिएको छ भने अधिकांशको स्वाब संकलन गर्न बाँकी छ ।
प्रतिक्रिया दिनुहोस !
