विराटनगर : कोरोना संक्रमितको संख्या थपिँदै जाँदा प्रदेश १ सरकारले संक्रमितको उपचार गर्ने अस्पताल थप्दै अनलाइनबाटै संक्रमितको भर्ना गर्न सुरु गरेको छ । मोरङ सुन्दरहरैचाको कोरोना उपचार केन्द्रमा संक्रमितको भर्ना पहिलोपटक अनलाइन प्रणालीबाट सुरु गरिएको हो । पूर्वाञ्चल विश्वविद्यालयको मेडिकल कलेजमा स्थापना गरिएको कोरोना उपचार केन्द्रमा संक्रमितको भर्ना अनलाइन प्रणालीबाट सुरु गरिएको सामाजिक विकास मन्त्री जीवन घिमिरेले जानकारी दिए ।
संक्रमितहरु अस्पतालमा आएर भर्ना हुन समय लाग्ने गरेको भन्दै उनले संक्रमित भर्ना हुनुअघि अनलाइनबाट वेड बुक गर्नसक्ने प्रबन्ध गरिएको मन्त्री घिमिरेले बताए । ‘संक्रमितले वेड वुक गरेपछि वेड नं. र वेडको लोकेसनका आधारमा भर्ना हुनेछन्,’ घिमिरेले भने ।
संक्रमण देखिएको स्थानबाट एम्बुलेन्सले अस्पताल ल्याएर छाड्ने र संक्रमित सोझै वेडमा पुग्ने व्यवस्थापन मिलाइएको मन्त्री घिमिरेको भनाइ छ। अनलाइन भर्नाका लागि नेपाली सेना, पूर्वाञ्चल विश्वविद्यालय मेडिकल टिम र सामाजिक विकास मन्त्रालयबाट व्यस्थापन टिम तयार गरिएको छ । कोरोना उपचार केन्द्रको बाहिरी व्यवस्थापनको जिम्मेवारी नेपाली सेनालाई दिइएको छ ।
सुन्दहरैचामा संक्रमितको उपचार शुरु भएपछि सामाजिक विकास मन्त्री घिमिरे, मन्त्रालयका अस्पताल महाशाखा प्रमुख सागर प्रसाई लगायतले अनुगमन समेत गरेका छन् । मन्त्री घिमिरेले थप व्यवस्थित बनाउन पूर्वाञ्चल विश्वविद्यालय मेडिकल संकायका डिन डा.शैलेश पोखरेल, नर्सिङ क्याम्पस प्रमुख कविता अधिकारी, नेपाली सेनाका मेजर, अस्पताल प्रशासन प्रमुखसँग छलफल गरेको र समय अनुकुल आधुनिक बनाउँदै जाने जानकारी दिए ।
शुक्रबारदेखि सञ्चालनमा आएको सुन्दरहरैचाको कोरोना उपचार केन्द्रमा हालसम्म ५२ जना उपचाररत छन् । उपचार केन्द्रमा अहिले ७४ वेड तयार गरिएको छ । सामाजिक विकास मन्त्री घिमिरेले थप ५१ वेडको तयारी गर्न निर्देशन दिएका छन् । ५१ वेड थपिएपछि सुन्दरहरैचामा १ सय २५ वेड तयार हुने छ।
संक्रमितको उपचारमा पूर्वाञ्चल विश्वविद्यालयका स्वास्थ्यकर्मी खटिएका छन् । सामाजिक विकास मन्त्रालयले समग्र व्यवस्थापकीय र चिकित्सकीय कामका लागि मेडिकल अफिसर डा. रोहित भण्डारी र अधिकृत धरणी निरौलालाई खटाउने भएको छ । मन्त्रालयले अस्पतालमा २४ सै घण्टाका लागि एउटा एम्बुलेन्सको पनि प्रवन्ध गर्ने भएको छ ।
प्रतिक्रिया दिनुहोस !
