सिन्धुलीको भिमान र सुनकोशीमा 'होल्डिङ सेन्टर', कमलामाईमा शव व्यवस्थापन

सिन्धुली : छिमेकी मुलुक भारत तथा तेस्रो मुलुकबाट स्वदेश फर्किएकालाई राख्न सिन्धुलीको भिमान र सुनकोसीमा दुईवटा 'होल्डिङ सेन्टर' बनाइने भएको छ ।  कोरोना भाइरस (कोभिड-१९) को त्रासका कारण स्वदेश फर्किने नेपालीलाई क्वारेन्टाइन वा सेल्फ क्वारेन्टाइनसम्म नजाँदाको समयमा होल्ड गर्न जिल्लाको भिमान र र सुनकोसी गाउँपालिकामा 'होल्डिङ सेन्टर' बनाउने निर्णय गरिएको हो । 

यस्तो निर्णय जिल्ला प्रशासन कार्यालय सिन्धुलीमा बसेको संकट व्यवस्थापन केन्द्रले गरेको हो । भिमान र सुनकोसी दुबै छिमेकी जिल्लासँग जोठिएका नाका क्षेत्र हुन् ।  भारतलगायत तराईका जिल्लाहुँदै आउँनेहरुका लागि महोत्तरी र धुनषा जिल्ला जोडिएको सीमा क्षेत्र कमलामाई नगरपालिका ९ भिमान र राजधानी काठमाडौंबाट  वीपी राजमार्गहुँदै आउनेहरुका लागि काभ्रे जिल्लासँग सीमा जोडिएको क्षेत्र सुनुकोसी गाउँपालिकामा बनाइने छ ।

प्रमुख जिल्ला अधिकारी योगेन्द्र प्रसाद पाण्डेका अनुसार भिमानमा रहेको आजाद स्मृति भनव र नयाँ निर्माण भइहरको वन कार्यालयको भवनलाई होल्डिङ सेन्टरको रुपमा तयार गरी प्रयोग गर्ने निर्णय भएको हो । 'काठमाडौंबाट आउनेहरुलाई राख्न सुनकोशी गाउँपालिकाको प्रगतीशिल माविमा होल्डिङ सेन्टर तयार पारिने छ,' उनले भने । 

उता जिल्लामा हुने संक्रमणको सम्भावित जोखिमलाई मध्यनजर गर्दै आइसोलेसन र क्वारेन्टाइनको संख्यालाई समेत विस्तार गरिने भएको छ । यसका लागि कमलामाई नगरपालिका ६ राम्माडीमा रहेको एपोलो हस्पिटलमा २५ बेडको आइसोलेसन कक्षा तयार गरिने बताइएको छ ।

जिल्ला सदरमुकाममा हाल सिन्धुली अस्पतालमा ३३ बेडको आइसेलेसन संचालनमा छ । उता कोरोना संक्रमणका कारण सिन्धुलीमा कसैको मृत्यु भएमा त्यसको शव व्यवस्थापनका लागि कमलामाई नगरपालिका भित्रका स्थानको छनौट गर्ने तयारी भएको पनि प्रमुख जिल्ला अधिकारी पाण्डेले जानकारी दिए । 

'नेपाली सेना, नेपाल रेडक्रस सोसाइटी सिन्धुली, सिन्धुली अस्पताल र स्वास्थ्य कार्यालय सिन्धुलीको समन्वयमा शव व्यवस्थापन गर्ने गरिने भएको छ । यो स्वास्थ्य तथा जनसंख्या मन्त्रालयले तोकेको 'शव व्यवस्थापन प्रोटोकल २०७७' अनुसार तयार पारिने छ,' उनले भने ।