धादिङमा थपिए ७ जना संक्रमित : संक्रमितको सङ्ख्या ३० पुग्यो

धादिङ : भारतबाट फर्किएर क्वारेन्टाइनमा बसेका धादिङका थप सात जनामा कोरोनाको पुष्टि भएको छ । त्रिपुरासुन्दरी गाउँपालिकाको विभिन्न वडामा बनाइएका क्वारेन्टाइनमा रहेका ७ जनामा कोरोना संक्रमण पुष्टि भएको त्रिपुरासुन्दरी गाउँपालिकाका अध्यक्ष शम्भु थापाले जानकारी दिए ।

भारतबाट गाउँ फर्किएकालाई गाउँपालिका विभिन्न वडामा बनाइएको क्वारेन्टाइनमा राखेको थियो । अहिले पिसिआर गराउँदा पोजिटिभ भेटिएकाको आरडीटी गराउँदा भने नेगेटिभ रिपोर्ट आएको अध्यक्ष थापाले बताए । उनले भने, ‘हामीले उहाँहरुलाई क्वारेन्टाइनमा राखेर आरडीटी पनि गराएका थियौँ, आरडिटीको मात्रै विश्वास नलागेर पिसिआर गराउँदा आरडीटीमा नेगेटिभ देखिएकाको पिसिआर रिपोर्ट पोजिटिभ आएको हो ।’

संक्रमितमध्ये रानीपौवा मावि सल्यानटारको क्वारेन्टाइनमा १ जना र सुन्दरी मावि आगिन्चोकको क्वारेन्टाइनमा ६ जना रहेको अध्यक्ष थापाले जानकारी दिए ।

उनीहरुको गत जेष्ठ २५ गते स्वाव सङ्कलन गरी पिसिआर परीक्षणका लागि राष्ट्रिय जनस्वास्थ्य प्रयोगशाला टेकु पठाइएको थियो । संक्रमितको स्वास्थ्य अवस्था सामान्य रहेको छ । यसअघि त्रिपुरासुन्दरीकै क्वारेन्टाइनमा रहेका अन्य १२ जनाको आरडीटी पनि पोजिटिभ देखिएको थियो ।

संक्रमितको थप उपचार र आइसोलेशनको व्यवस्था तथा संक्रमितको सम्पर्कमा रहेकाको खोजपहिचान गर्नको लागि सदरमुकामबाट प्रमुख जिल्ला अधिकारी अस्मान तामाङ, स्वास्थ्य कार्यलय प्रमुख डाक्टर भुवन पौडेल लगायतको टोली सल्यानटार पुगेको छ । त्रिपुरासुन्दरी गाउँपालिकामा हाल भारतबाट आएर गाउँपालिकाले निर्माण गरेको क्वारेन्टाइनमा बस्नेको संख्या ५० जना रहेको स्वास्थ्य संयोजक यम बहादुर श्रेष्ठले जानकारी दिए ।  

योसँगै धादिङमा कोरोना भाइरसबाट संक्रमितको सङ्ख्या ३० पुगेको छ । गत सोमबार धादिङको नीलकण्ठ नगरपालिकाको क्वारेन्टाइनमा बसिरहेका १६ जनामा पनि कोरोना संक्रमणको पुष्टि भएको थियो । ३० जनामध्ये ३ जना भने निको भएर घर फर्किसकेका छन् ।