खादा र मिठाइ दिएर बिदाइ गरेका ७ जनाको कोरोना रिपोर्ट पोजिटिभ
असार ५, २०७७ शुक्रबार १६:४९:०
परासी : आइसोलेसनमा बसेर घर पठाइएका ७ जनामा कोरोना पोजिटिभ देखिएको छ । बिहीबार घर पठाउने क्रममा उनीहरुलाई प्रदेशसभा सदस्य, गाउँपालिका अध्यक्ष, स्वास्थ्य कार्यालय प्रमुख, वडाअध्यक्षले खादा र मिठाई खुवाएर बिदाइ गरेका थिए ।
पश्चिम नवलपरासीको पाल्हीनन्दन गाउँपालिकाका उनीहरुलाई भारतबाट आएपछि क्वारेन्टाइनमा राखिएको थियो । स्वाब संकलनका क्रममा पोजिटिभ देखिएपछि उनीहरुलाई पाल्ही प्राथमिक स्वास्थ्य केन्द्रको आइसोलेसनमा पठाइएको थियो ।
आइसोलेनमा बसेका उनीहरुको पुन: स्वाब संकलन गरेर परीक्षणका लागि पठाइएको थियो । १४ दिन आइसोलेसनमा बसेका उनीहरुलाई रिपोर्ट नआउँदै घर पठाइएको हो ।
शुक्रबार बिहान उनीहरुको रिपोर्ट पोजिटिभ आएको स्वास्थ्य कार्यालयका प्रमुख गौरव ढकालले बताए । 'आइसोलेसनमा बसेकालाई परीक्षण नगरी घर पठाउने आदेश छ । तैपनि हामीले उनीहरुको स्वाब संकलन गरेर पठाएका थियौं । रिपोर्ट नआउँदै घर पठाइएका उनीहरुमा पुन: पोजिटिभ देखियो, 'ढकालले भने ।
त्यसैगरी आरडीटी नेगेटिभ देखिएपछि घर पठाइएका सोही गाउँपालिकाका अर्का एकजनामा पोजिटिभ देखिको छ । क्वारेन्टाइनमा बस्दा उनीसँगै बसेकाको रिपोर्ट पोजिटिभ आएपछि कन्ट्रयाक ट्रेसिङका क्रममा उनको स्वाब संकलन गरिएको थियो । क्वारेन्टाइनमा बस्दा संक्रमितसँग सुर्ती मागेर खाएको बताएपछि कन्ट्रयाक ट्रेसिङ गरिएको थियो ।
१५ दिनसम्म घर बसेका उनको पोजिटिभ रिपोर्ट आएको स्वास्थ्य कार्यालय प्रमुख ढकालले बताए । उनीसँग सम्पर्कमा आएका व्यक्तिको पनि कन्ट्रयाक ट्रेसिङ गरिने छ । संक्रमित देखिएकामा कोरोनाको लक्षण नदेखिएको ढकालले जानकारी दिए ।
सरकारको निर्देशनअनुसार संक्रमित देखिएका सबैलाई होम आइसोलेसनमा बस्ने गरी कागज बनाएर घर पठाइएको स्वास्थ्य कार्यालय प्रमुख ढकालले जानकारी दिए । पाल्हीनन्दनमा मात्र संक्रमितको संख्या १२ पुगेको छ । जिल्लाभर ५० जना संक्रमित फेला परेका छन् ।
प्रतिक्रिया दिनुहोस !
