तानसेन : पाल्पामा थप ८२ जनामा कोरोना संक्रमण देखिएको छ । पूर्वखोला गाउँपालिकाको क्वारेन्टाइनमा रहेका ८० जना र माथागढी गाउँपालिकाको क्वारेन्टाइनमा बसेका २ जनामा सङक्रमण पुष्टि भएको हो ।
प्रदेश जनस्वास्थ्य प्रयोगशाला भैरहवामा गरिएको परीक्षणमा १ सय ३९ जनाको रिपोर्ट आउँदा पूर्वखोलाका ८० जनामा पोजिटिभ देखिएको जिल्ला स्वास्थ्य कार्यालय पाल्पाका सुचना अधिकारी ओमप्रकाश पन्थीले जानकारी दिए । संक्रमण भएका व्यक्ति ३ वर्षदेखि ५८ वर्ष उमेर समुहका रहेका छन् । जसमा पूर्वखोला गाउँपालिका वडा नं १ का ३५ जना, वडा नं ५ का २२ र वडा नं ३ का २३ जना रहेका छन् । सक्रमितमध्ये २३ देखि ६५ उमेर समूहका १५ जना महिला ६७ जना पुरुष छन्।
सक्रमित सबै गाउँपालिकाको गणपति, जनउज्वल र अकला विद्यालयको क्वारेन्टाइनमा बस्दै आएका छन् । एकै पटक यति धेरै सक्रमित देखिएपछि गाउँपालिकालाई व्यवस्थापन गर्न कठिनाइ भएको छ । यसअघि रम्भा गाउँपालिकाको सहकार्यमा निर्माण गरिएको आइसोलेसनमा सक्रमितलाई राखे पनि अहिले थप आइसोलेसन व्यवस्थापनमा जुटेको गाउँपालिकाका अध्यक्ष नुनबहादुर थापाले बताए ।
पूर्वखोलामा मात्र सक्रमितको संख्या ९२ पुगेको छ । माथागढी गाउँपालिकामा पनि २ जना पुरुषमा संक्रमण देखिएको गाउँपालिकाका अध्यक्ष सन्तोष थापा मगरले जानकारी दिए । उनीहरु दुई हप्ताअघि भारतबाट आएर वडा नं ७ सिद्धार्थ माविको क्वारेन्टाइनमा बस्दै आएका थिए । उनीहरुको आरडिटी परीक्षण नेगेटिभ आए पनि, पिसिआरको परीक्षणको लागी स्वाव संकलन गरी प्रादेशिक प्रयोगशाला पठाएकोमा पोजिटिभ देखिएको अध्यक्ष थापाले बताए । योसँगै माथागढी गाउँपालिकामा संक्रमितको संख्या १७ पुगेको छ ।
पाल्पामा सक्रमितको संख्या १७६ पुगेको छ । यसअघि बगनासकाली गाउँपालिकामा १७ जना, रम्भा गाउँपालिकामा १६ जना, माथागढी गाउँपालिकामा १४ जना, रैनादेवी छहरा गाउँपालिकामा २० जना, रिव्दीकोट गाउँपालिकामा ४ जना, निस्दी गाउँपालिकामा २ जना, रामपुर नगरपालिकामा २ जना, पुर्वखोला गाउँपालिका १२ जना, तिनाउँ गाउँपालिकामा ३ जना, लुम्विनी मेडिकल कलेजमा उपचारको क्रममा गुल्मीका २ जना अर्घाखाचीका एक जनामा कोरोना सक्रमण देखिएको छ । संक्रमितमध्ये पूर्वखोलाका एक जनाको उपचारको क्रममा मत्यु भएको छ भने ५ जना निको भइ घर फर्किएका छन्।
प्रतिक्रिया दिनुहोस !
