जनकपुरधाम : धनुषाको हंसपुर नगरपालिकास्थित क्वारेन्टाइनमै सिकिस्त बिरामी भइ मृत्यु भएका राजु सदाको मृत्यु घटना सम्बन्धमा छानविन गर्न अध्ययन विशेष समिति गठन भएको छ ।
आइतबार बसेको प्रदेश २ को प्रदेससभा बैठकमा प्रादेशिक अस्पतालमा भएको घटनालाई छानविन गर्न ५ सदस्यीय अध्ययन विशेष समिति गठन गरिएको हो । समितिमा प्रदेशसभा सदस्य रवीन्द्र बैठा, चमेली देवी दास, सुरीता कुमारी साह, नरेश कुमार यादव र सावित्री देवी साह सदस्य छन् ।
सभामुखको निर्देशनमा रही समितिले आवश्यकता अनुसार विशेषज्ञ लगायत सम्बन्धित अन्य व्यक्तिहरुको सहयोग लिन सक्ने जनाइएको छ । विभिन्न मन्त्रालय वा कार्यालयबाट आवश्यक कागजात माग गर्न सक्ने र पदाधिकारीहरुसँग छलफल गर्न सक्ने समितिको कार्यविधि बनाइएको सभामुख सरोज यादवले बताए । समितिले ५ दिनभित्र आफ्नो प्रतिवेदन प्रदेशसभामा बुझाउनु पर्नेछ ।
कोरोना संक्रमण भएको आशंकामा प्रादेशिक अस्पताल जनकपुरमा ल्याइएका धनुषाको हंसपुर नगरपालिका ७ प्रसाही बस्ने १६ वर्षीय राजु सदाको मृत्यु भएको थियो । सदाको मृत्युपछि उनका परिवारजनले अनुसन्धानको माग गर्दै आन्दोलन गरेका थिए ।
भारतबाट आएर हंसपुर नगरपालिकाको क्वारेन्टाइनमा रहेका सदालाई प्रादेशिक अस्पतालमा जेठ २८ गते भर्ना गरिएको थियो । कोरोना नभइ अन्य रोगबाट ग्रसित भएका सदालाई प्रादेशिक अस्पतालमा ल्याइए पनि कोरोना शंकाकै भरमा ९ गते विहान उनको मृत्यु भएको थियो । भारतको मद्रासमा लकडाउनमा फर्किएका सदा गत जेष्ठ १४ गते फर्किएका थिए । घटनाको छानविन गर्न प्रदेश सरकारले समेत तीन सदस्यीय समिति बनाएको छ ।
प्रतिक्रिया दिनुहोस !
