प्यूठानका बालीभरि सलह : किसान चिन्तित

प्यूठान : प्यूठानको आकाश सलहले ढाकेको छ । जिल्लाका प्राय सबैजसो क्षेत्रमा सलहले मकैबाली नष्ट गरेको छ । मंगलबार बिहानदेखि फैलिएको सलह अझैसम्म बालीमा देखिएको छ । 

तराई क्षेत्रमा देखिएको सलह गाउँगाउँमा पनि फैलिएपछि किसान चिन्तित बन्दै गएका  छन् । बारीमा भएको मकैभरि छलहले ढाकेको किसानहरुले बताएका छन् । आगो बाल्ने, थाल ठटाउने जस्ता तरिका अपनाए पनि सलह नभागेको झिमरुक ५ दारीमचौरका स्थानीय हुकुम बहादुर खड्काले बताए । सहल भगाउन किसानहरुलाई हम्मेहम्मे परिरहेको उनले प्रतिक्रिया दिए । ‘सलहले हल्लीखल्ली नै मच्चायो’, खड्काले भने, ‘बालीनाली सखाप पार्‍यो ।’ प्यूठान नगरपालिका क्षेत्रको झिमरुक फाँट, मल्लरानी, झिमरुक र गौमुखी गाउँपालिका क्षेत्रको आकाशमा यो धेरै फैलिएको छ । 

कोरोनाकै तनावका बीचमा भित्रिएको सलहले हुर्कंदै गरेको मकैबाली नष्ट गरेपछि खाद्यान्न अभाव हुने चिन्तामा किसान छन् । क्षतिको एकिन तथ्यांक संकलन गरी किसानहरुलाई राहतका कार्यक्रम ल्याउन किसानले सरकारसँग आग्रह गरेका छन् ।