कालिकोट : जिल्लाको खाँडाचक्र नगरपालिकाका साथै आसपासका क्षेत्रमा सलह किरा देखिएका छन्। केही दिनअघि नेपाल भित्रिएको सलह किरा कालिकोटमा पनि पुगेको हो।
बुधबार जिल्ला सदरमुकाम खाँडाचक्र नगरपालिका वडा नं. १ स्थित मान्मको गाँउमा मकै बालीमा सलह किरा देखिएको कृषि विकास कार्यालय कालिकोटका प्रमुख भरत बस्नेतले बताए। उनले भने, ‘खाँडाचक्र नगरपालिकाका केही क्षेत्रमा सलह किरा देखियो भनेर किसानले खबर गरेपछि हामीले फिल्डमा जाँदा सलह किरा भेटायौं। अहिले धेरै ठूलो झुण्ड नभए पनि फाटफुटमा सलह देखा परेको छ।'
अमेरिकी फौजी किराको प्रकोपले पीडित भएका यहाँका किसान फेरि सलह पनि देखिन थालेपछि चिन्तित बनेका छन्।‘केही दिन अगाडिदेखि अमेरिकन फौजी किराले खतम पार्न लागेको मकैबालीमा सलह पनि देखिएपछि थप निराश बनायो। अब खेतमा लगाएका मकै, कोदो, धान लगायतका वर्षेबाली नष्ट हुने भयो। बाली सबै किराले खाएपछि परिववार कसरी पाल्ने हो', खाँडाचक्र नगरपालिका वडा नं २ का किसान अने विकले भने, 'फौंजी किराको प्रकोप झेलिरहेका कालिकोटका विभिन्न ठाउँका किसान फेरि सलह किरा देखिन थालेपछि चिन्तित बनेका छन्।’
बारीमा सलह देखा परेमा ठूलो आवाजमा थाल बजाउनुपर्ने, बाजा बजाउनुपर्ने र राती सलह बसेको ठाउँमा विषादी छर्कने सल्लाह दिएको खाँडाचक्र नगरपालिका कृषि शाखा प्रमुख प्रशुराम काफ्लेले बताए। मकैबालीलाई क्षति गर्ने मिचाहा प्रवृतिको पुतली वर्गमा पर्ने रात्रीचर किराले दोस्रोपटक गोडमेल गर्ने बेलाको मकै सखाप पारेपछि किसान चिन्तित भएका छन्। बैशाखमा छरेको मकै एकपटक गोडमेल गरी हुर्किसकेको अवस्थामा दोस्रोपटक गोडमेल गर्न जाँदा किराले सखाप पारेको थाहा पाएको किसानले बताएका छन्। फौजी किराको प्रकोप नियन्त्रण नहुँदै सलहसमेत देखापरेपछि वर्षेबाली जोगाउन आवश्यक विषादी तथा अन्य उपाय सिकाउन स्थानीय किसानले कृषि कार्यालयलाई अनुरोध गरेका छन्।
प्रतिक्रिया दिनुहोस !
