असारे विकासको हतारोले बालकको ज्यान गयो

राजविराज : असारे विकासको हतारोले सावधानी नअपनाइ विकास निर्माणको काम गर्दा भत्किएको घरले किचेर सप्तरीमा बिहीबार एक बालकको मृत्यु भएको छ । सडकमा माटो सम्याउने र बसाउने काम गरिरहेको रोलरको कम्पनले खडक नगरपालिका–१ सिस्वामा अचानक एक घरको पर्खाल लडेर बालक च्यापिंदा स्थानीय ८ वर्षीय उमेश मण्डलको घटनास्थलमै मृत्यु भएको प्रहरीले जनाएको छ । 

    
असारको अन्तिम समयमा नगरपालिकाकै रोलर र स्काभेटर प्रयोग गरी हतार–हतार काम गर्न खोज्दा सामान्य सावधानी पनि नअपनाएकोले बालकको ज्यान गएको भन्दै स्थानीयवासीले वडा अध्यक्ष सिंहेश्वर मण्डलसहित उपभोक्ता समितिका पदाधिकारीलाई कारवाही गर्न माग गर्दै प्रदर्शन गरेका छन् । घटनास्थलमै बालकको शव राखी प्रदर्शन गरिरहेका स्थानीयवासीले खडक नगरपालिकाबाट लापरवाहीयुक्त काम भएकोले वडा अध्यक्ष, उपभोक्ता समितिका पदाधिकारीमाथि समेत कडा कारवाही गर्न माग गरेका हुन् । 
    
स्थानीयवासीले अति कम्पन दिने भ्याब्रेटर रोलर बस्तीमै चलाउँदा सर्वसाधारणलाई सूचित नगरेको र बालक च्यापिंदासमेत मजदुरले वास्ता नगरेको बताए । वडा अध्यक्ष मण्डलले मजदुरी काम गर्ने नजिकका मान्छे छविल मण्डललाई ३० लाखको आरसीसी सडक ढलानको योजना दिएर सुरुदेखि नै लापरवाही गर्दै आएको स्थानीय वृजनारायण साहले आक्रोश व्यक्त गरे ।
    
काम गर्ने बेलामा उपभोक्ता समितिका जिम्मेवार पदाधिकारी कोही पनि उपस्थित नरहेको र काममा खटाइएका चालक, मजदूरहरुले समेत पर्खाल भत्किएर बालक च्यापिँदा वास्ता पनि नगरेको स्थानीयवासीले बताए । रोलर मेसिनको कम्पनको असरका कारण वर्षायाममा पानीले भिजेर कमजोर बनेको पिलर नभएको घरको पर्खालको गारो भत्किएर बालकमाथि नै खसेको इलाका प्रहरी कार्यालय कडरबोनाका इन्स्पेकटर रामराजा केशरीले बताए ।
    
प्रदर्शनकारीले कारवाही र क्षतिपूर्तिको माग राखी शव उठाउन नदिएपछि घटनास्थलमा ठूलो सङ्ख्यामा जिल्ला प्रहरी कार्यालय, इलाका प्रहरी कार्यालय कडरवोना, इलाका प्रही कार्यालय कल्याणपुर र सशस्त्र प्रहरीको टोली पुगेको छ । चालकलाई पक्राउ गरी हदैसम्मको कारवाही गर्ने र अन्य आवश्यक प्रक्रियाको लागि पहल गर्ने बताए पनि प्रदर्शनकारीले वडा अध्यक्ष मण्डल र उपभोक्ता समितिका अध्यक्ष मण्डललाई पक्राउ गरी कारवाही  हुनु पर्ने अडान राखिरहेका छन् ।