बाढीले अवरुद्ध पूर्व-पश्चिम राजमार्गको लच्का सडकखण्ड संचालनमा

रौतहट : अविरल वर्षाका कारण पूर्व-पश्चिम राजमार्गको चन्द्रपुर पौराइ खण्डमा रातीदेखि अवरुद्द भएको सडकमा ठूला सवारी साधन संचालन हुन थालेका छन्। चन्द्रपुर २ स्थित चादी पारी रहेको लच्कामा बाढीले सडक अवरुद्ध गरेको हो । बिहीबार रातिदेखि परेको लगातारको वर्षापछि रातीबाट नै सडक अवरुद्ध भएको थियो । 

राजमार्गमा गुड्ने ठूला साधनलाई पालैपालो पास गराए पनि साना साधनलाई संचालनमा समस्या छ । बाढी केही कम भएपछि ठूला गाडीलाई पालैपालो गरी आवतजावत गर्न व्यवस्था मिलाएको इलाका प्रहरी कार्यालय चन्द्रनिगाहपुरका डिएसपी हेमबहादुर शाहीले जानकारी दिए।

लच्कामा बाढीका कारण रातीदेखि करिब ३ सयको हाराहारीमा मालबाहक ट्रक, साना जीप, कार, मोटरसाइकल र एम्बुलेन्स रोकिएका थिए । जोखिमपूर्ण रुपमा केही मानिस मोटरसाइकल गुडाएर वारपार गरिरहकेका छन् भने केहीले काँधमा साइकल बोकेर आवतजावत गरिरहेका छन्। हरेक वर्ष लच्कामा बाढी आएर यातायात अवरुद्ध हुने गरेको छ ।