पहिरोले बेनी–जोमसोम सडक अवरुद्ध

जोमसोम : बेनी-जोमसोम सडकको मुस्ताङतर्फ पर्ने मुख्य राजमार्ग अवरुद्ध भएको छ। बिहीबार रातिको वर्षाले मुस्ताङको थासाङ गाउपालिका-३ र ४ वडाको मुख्य सडकमा पहिरोले सडक अवरुद्ध हुँदा बेनी-जोमसोम सडक अवरुद्ध भएको जिल्ला प्रहरी कार्यालय मुस्ताङले जनाएको छ ।

वर्षाले थासाङ गाउँपालिका-४ को तल्लो घासास्थित थाप्लाङ खोला, थासाङ-४ कै उपल्लो घासामाथि चेतन डाँडा र थासाङ गाउँपालिका-३ लेते खोला नजिक पहिरोले सडक अवरुद्ध भएको जिल्ला प्रहरी कार्यालयका प्रहरी नायव उपरीक्षक नविनकुमार भट्टराईले जानकारी दिए । 

थासाङको थाप्लाङ खोलामा ठाडो खोलामा आएको बाढीले सडक पुरिएको हो ।  चेतन डाडा र लेते खोला नजिक निर्माण भइरहेको सडक माथिबाट आएको पहिरोले सडक पुरिएको थासाङका वडाध्यक्ष विशाल शेरचनले जानकारी दिए । पहिरोले ३ स्थानमा करिव १० मिटरदेखि १५ मिटर सडक पुरिएको छ । 

बेनी-जोमसोम सडक जोड्ने म्याग्दीको रघुगंगा गाउँपालिका गलेश्वरको अस्थायी बेलीब्रिज समेत बाढीले बगाएको छ । म्याग्दी र मुस्ताङ खण्डमा ठाउँठाउँमा आएको बाढी पहिरोले  बेनी-जोमसोम सिधा यातायात सम्पर्क बिच्छेद भएको घासा प्रहरी चौकीका इञ्चार्ज निमप्रसाद तिमिल्सिनाले जानकारी दिए ।