जाजरकोट : पहिरोले गाँउ बगाउन थालेपछि जाजरकोटको बारेकोटमा ४० घरपरिवार विस्थापित भएका छन् । घर नजिकैबाट पहिरो जान थालेपछि बारेकोट–४ जिरीका ३२ र गोठगाँउका ८ घर विस्थापित भएको प्रहरीले जनाएको छ । उनीहरुलाई स्थानीय दुई विद्यालयमा राखिएको जिल्ला प्रहरी प्रमुख डिएस्पी किशोर श्रेष्ठले जानकारी दिए । पानी नरोकिएकाले अहिले पनि धेरै घर जोखिममा छन् । बिहीबार राति आएको पहिरोले बारेकोट ४ सार्कीटोलका दुई घर बगाउँदा ७ जनाको मृत्यु भएको छ । पाँच जना बेपत्ता छन् ।
बेपत्ताको खोजी कार्य शनिबार बिहानैदेखि जारी रहेको डिएएपी श्रेष्ठले जानकारी दिए । नेपाली सेनाको उद्धारटोली घटनास्थल पुगेर खोजी गरिरहेको छ । खराब मौसमका कारण उद्धारमा कठिनाई भएको बारेकोट गाँउपालिकाका अध्यक्ष महेन्द्र शाहले बताए । बारेकोट–५ तोल्खान, कालाखोली, भैलोखान, वडा नं ४ गोठगाँउ, जिरी, मैना लगायतका बस्ती पहिरोको उच्च जोखिममा रहेकाले स्थानीय विद्यालयमा बस्न आग्रह गरिएको उनले बताए ।
अध्यक्ष शाहका अनुसार ती गाँउका करीब ६० घरधुरी पहिरोको जोखिममा परेका छन् । पानी परिरहेकोले स्थानीय त्रसित भएका छन् ।त्यस्तै बारेकोट ६ धुमाका २० वर्षीय शान्तबहादुर चलाउने र १० वर्षीय प्रचण्ड चलाउनेलाई स्थानीय एक खोलाले बेपत्ता बनाएको छ । रामचन्द्र चलाउने र विज्ञान बोहरालाई स्थानीयले खोलामा आएको बाढीबाट उद्धार गरेका छन् । रामचन्द्र गम्भीर घाइते भएको गाँउपालिकाका प्रमुख प्रशासकीय अधिकृत गोविन्द सिँहले जानकारी दिए । जिल्लाको जुनीचाँदेमा खोलामा एक जना वेपत्ता भएका छन् । भीरबाट लडेर खोलामा परेका जुनीचाँदे ११ का डिल्लीबहादुर चनारा सानाखोलामा बेपत्ता भएका हुन ।
त्यस्तै बारेकोट ४ का लालबहादुर नेपाली पहिरोमा परी गम्भीर घाइते भएका छन् । पहिरोले घर भत्काएको र भाग्ने क्रममा उनी घाइते भएका थिए । घाइते दुई जनाको उद्धारका लागि सुर्खेतबाट हेलिकोप्टर आउने भनिए पनि खराब मौसमका कारण आउन सकेको छैन । घाइते घरमै उपचार अभावमा छट्पटाइरहेको गाँउपालिका अध्यक्ष शाहले बताए । घटनास्थल बारेकोट सदरमुकाम खलंगादेखि दुई दिन पैदल दूरीमा २५ कोष उत्तरपूर्वमा पर्छ।
प्रतिक्रिया दिनुहोस !
