सिन्धुली : सिन्धुलीको कमलामाई नगरपालिकाले झण्डै साढे १६ करोड रुपैयाँ खर्चेर अत्याधुनिक सभाहल बनाउने भएको छ ।नगरविकास कोषसँग ऋण लिएर नगरपालिकाले सपिङ महलसहितको चार तले सभाहल निर्माण गर्न लागेको हो।
कमलामाई नगरपालिका ६ स्थित जिल्ला समन्वय समितिको पुरानो सभाहललाई भत्काएर अत्याधुनिक सभाहल निर्माण गर्नेगरी आइतबार नगरपालिका र नगरविकास कोषबीच सम्झौता भएको नगरपालिकाका सूचना अधिकृत सागरकुमार ढकालले जनाए ।
सभाहल निर्माणका लागि ऋण सम्झौता पत्रमा कमलामाई नगरपालिकाका मेयर खड्ग खत्री र नगर विकास कोषका निमित्त कार्यकारी निर्देशक राजेश कुमार भोछिभोयबीच ऋण आइतबार हस्ताक्षर भएको हो ।'उक्त सभाहल निर्माणका लागि कोषबाट ११ करोड रुपैयाँ ऋण दिने र नगरपालिकाले झण्डै साँढे पाँच करोड रुपैयाँ लगानी गर्ने छ,' उनले भने ।
सभाहल निर्माणका लागि १६ करोड ४७ लाख ८४ हजार रुपैयाँ लाग्ने अनुमान गरिएको छ । 'चारतले उक्त भवनमा जमिनमुनी पार्किङ, पहिलो र दोस्रो तालमा सपिङ मल र तेस्रो तलामा कम्तिमा ५ सय जना अटाउने सुविधा सम्पन्न सभाहल निर्माण गरिनेछ,' ढकालले भने । लिफ्टसहित निर्माण गरिने उक्त भवन २ वर्षभित्र सक्ने योजनासहित सम्झौतमा हस्ताक्षर भएको हो । 
प्रतिक्रिया दिनुहोस !
