बाजुरा : बाजुराको बुढिगंगा नगरपालिका-१ अम्कोटमा पहिरोमा परी एक जना बेपत्ता भएका छन् भने दुई जना घाइते भएका छन्। बेपत्ता हुनेमा सोही नगरपालिका वडा नम्बर १ अम्कोट निबासी २१ वर्षीया धर्मराज पाध्याय रहेका छन्।
घाइते हुनेमा १७ वर्षीया ज्ञानराज पाध्याय र १६ वर्षीया हरेन्द्र पाध्याय रहेको जिल्ला प्रहरी कार्यालयका सुचना अधिकारी प्रहरी निरीक्षक दानबहादुर रोकायाले बताए। बुधबार दिउँसो बाख्रा चराउन गएको समयमा माथिबाट आएको पहिरोमा परी एक जाना बेपत्ता भएका छन् भने २ जना घाइते भएको नजिकै सुरक्षामा रहेका प्रहरी टोलीबाट सुचना आएको प्रहरी निरीक्षक रोकायाले बताए।
अमकोटको पहिरोमा आउने जाने यात्रुको सुरक्षाको लागि अमकोट नजिकै प्रहरी टेली रहेकोले घाइतेको तत्काल उद्धार गरिएको जिल्ला प्रहरी कार्यालय बाजुराले जनाएको छ। घाइतेमध्ये ज्ञानराज पाध्यायको अवस्था गम्भीर रहेको छ भने हरेन्द्र पाध्यायको अवस्था सामान्य रहेको प्रहरीले जनाएको छ।
बेपत्ता भएका धर्मराज पाध्यायको खोजी कार्य जारी रहेको जिल्ला प्रहरी कार्यालय बाजुराका प्रहरी निरीक्षक दानबहादुर रोकायालले बताए। बुधबार दिउँसो ३ बजेतिर बाख्रा चराउन गएको बेला सो घटना भएको प्रहरीले जनाएको छ।
प्रतिक्रिया दिनुहोस !
