कालिकोटको पलाँतामा पहिरो, एकको मृत्य, दुईजना घाइते

कालिकोट : कालिकोटको पलाँता गाउँपालिका ८ बेरसनकोटको दाम्रीजिउलास्थित कांख्रेपदालोमा पहिरो खस्दा एकजनाको मृत्यु भएको छ । केरसनकोटको दाम्री जिउला आउने कुलो मर्मतका लागि गएका स्थानीय कमल रोकायाको पहिरोमा परी मृत्यु भएको हो । उक्त पहिरोमा दुईजना स्थानीय घाइते भएका छन् । 

पहिरोका कारण अवरुद्ध कुलो मर्मतका लागि गाउँबाट गएका स्थानीयले कुलो मर्मत गरिरहेका बेला पहिरो खस्दा कमलको घटनास्थलमै मृत्यु भएको र दुईजना घाइते भएको स्थानीय सुरजन रोकायाले जानकारी दिए । 

उनका अनुसार घाइते हुनेहरुमा पलाँता गाउँपालिका ८ बेरसनकोटका पुनबहादुर रोकाया र नैन रोकाय रहेका छन् । उनीहरुको अवस्था सामान्य छ । जिल्ला प्रहरी कार्यालय प्रमुख डीएसपी श्यामबाबु ओलीयाले पलाँता गाउँपालिका ८ मा पहिरो गएको स्थानमा प्रहरी टोली पठाएको बताए ।