जोमसोम : हिमाली जिल्ला मुस्ताङ आउजाउमा समस्या भएको छ । चैत्र ११ गतेदेखि कोरोना भाइरसका कारण लकडाउनले हवाई सेवा ठप्प छ ।
पछिल्लो समय बेनी-जोमसोम सडकमा बाढीपहिरो क्षति गरेपछि मुस्ताङ आउजाउमा समस्या थपिएको छ । लकडाउनले पोखरा-जोमसोम हवाई उडान ४ महिनादेखि ठप्प छ । यस्तै बेनी-जोमसोम सडकखण्डअन्तर्गत म्याग्दी र मुस्ताङखण्डका दर्जनौं स्थानमा बाढीपहिरो र नदी कटानले सडकको ट्र्याक भासिएको छ ।
पक्की पुलमा क्षति पुगेको र कतिपय स्थानमा पूरै सडक संरचना बगाएका कारण गत असार २८ गते बेनी-जोमसोमको सीधा यातायात सम्पर्क बिच्छेद भएको बेनी—जोमसोम-कोरला सडक आयोजनाका इन्जिनियर अश्विनीकुमार यादवले जानकारी दिए ।
वर्षाले धावनमार्ग र लकडाउनले हवाई सेवा सञ्चालन नभएपछि मुस्ताङका स्थानीयबासी, कर्मचारी जनप्रतिनिधि र सुरक्षा निकायको अतिआवश्कीय कामकाजमा समस्या थपिएको हो । बेनी-जोमसोम सडक साविक जसरी सञ्चालन गर्न अझै ३ साता लाग्ने आयोजनाले जनाएको छ ।
प्रतिक्रिया दिनुहोस !
