काठमाडौं : रामेछाप जिल्लाको गोकुलगंगा गाउँपालिकामा एक महिलाको शव फेला परेको छ । गोकुलगाउँपालिका -३ धारापानीस्थित खिम्ती खोलाको किनारमा सोमबार ५५ वर्षीया ठुलोकान्छी गुभाजुको शव भेटिएको जिल्ला प्रहरी कार्यालय रामेछापका प्रवक्ता टेकेन्द्र पौडेलले जानकारी दिए ।
उनका अनुसार चुचुरेस्थित बालकृष्ण गुभाजुकी श्रीमती गत साउन ११ गते १ बजेबाट हराएकी थिइन् । बेपत्ता भएकी उनलाई आफन्तले खोज्दा मृत अवस्थामा फेला परेको पौडेलले जानकारी दिए। घटनाको बारेमा अनुसन्धान भइरहको उनले बताए ।
सर्पले डसेर मृत्यु
रामेछाप नगरपालिका- ४ हिमगंगामा सर्पले टोक्दा आइतबार एक युवतीको मृत्यु भएको छ । हिमगंगा निवासी १९ वर्षीय रविना मगरलाई सुतिरहेको अवस्था सर्पले डसेको हो । जिल्ला प्रहरी कार्यालय रामेछापका अनुसार बाँया हातको औँलामा सर्पले टोकेर बिरामी भएकी मगरलाई उपचारका लागि साँघुटारमा रहेको मेडिकलमा लगिएको थियो । त्यहाँ उपचार सम्भव नभएपछि मन्थली तामाकोशी सहकारी अस्पतालमा ल्याउने क्रममा बाटोमै उनको मृत्यु भएको हो।
प्रतिक्रिया दिनुहोस !
