कालिकोटमा बाढी-पहिरो बितण्डता : १८ जनाको मृत्यु, ७ वेपत्ता, ३ सय ५८ घर भत्किए
साउन २२, २०७७ बिहीबार १०:५५:०
कालिकोट : जिल्लामा वर्षायाम सुरु भएसँगै बाढी र पहिरोमा व्यापक जनधनको क्षति भएको पाइएको छ । बुधबार विपद् व्यवस्थापन समिति कालिकोटको बैठकमा प्रस्तुत गरिएको बाढी र पहिरोबाट भएको क्षतिको विवरण अनुसार यस वर्ष जिल्लामा बाढी र पहिरोबाट व्यापक क्षति भएको पाइएको हो ।
सहयाक प्रमुख जिल्ला अधिकारी युवराज गुरागाईले गत असार यता जिल्लामा बाढी र पहिरोमा परी १८ जनाको मृत्यु, ७ जना बेपत्ता भएको जानकारी दिए । उनका अनुसार जिल्लाका ९ वटै स्थानीय तहमा गरी ३ सय ५८ घर भत्किएका छन् । जम्मा ५ सय ९५ परिवार विस्थापित भएका छन् । २ हजार ५ सय ५६ परिवार संख्या गासबासबिहीन भएका छन् ।
जिल्लाको सबैभन्दा बढी क्षति भएको नरहरीनाथ गाउँपालिकामा १० जनाको मृत्यु, एकजना वेपत्ता, ५३ घर भत्किए, ४९ परिवार विस्थापित भएका छन् ।कुल १ हजार ९ सय १९ परिवार संख्या गासवासबिहीन भएका छन् । यस्तै रास्कोटल नगरपालिकामा २ जनाको मृत्यु, ५ जना वेपत्ता, ३० घर भत्किए, १६ परिवार विस्थापित, ८९ परिवार संख्या गासवासबिहीन भएका छन् ।
यस्तै सान्नीत्रिवेणी गाउँपालिकामा २ जनाको मृत्यु, १ सय ३ घर भत्किए, ५१ परिवार विस्थापित, ३ सय ४७ परिवार संख्या गासवासबिहीन भएका छन् । पचालझरना गाउँपालिकामा १ जनाको मृत्यु, १ सय २२ घर भत्किए, ३ घर विस्थापित, २६ जना परिवार संख्या गासवास बिहीन भएका छन् ।
यस्तै पलाँता गाउँपालिकामा १ जनाको मृत्यु, ८ घर भत्किएका छन् । यस्तै तिलागुफा नगरपालिकामा ८ घर भत्किए, १ घर विस्थापित, ४ जनाको परिवार गासवासबिहीन भएका छन् । 
महाँवै गाँउपालिकामा २ जनाको मृत्यु, ५ घर भत्किए, १ घर विस्थापित, १२ जनाको परिवार संख्या गासवास बिहीन भएका छन । यस्तै शुभकालिका गाँउपालिकामा ९ घर भत्किए, ९ परिवार विस्थापित भएका छन् । ८२ परिवार संख्या गासवास बिहीन भएका छन् ।
प्रमुख जिल्ला अधिकारी चन्द्रप्रसाद गैरेको अध्यक्षतामा बसेको बैठकमा नरहरीनाथ गाउँपालिका अध्यक्ष धिरबहादुर बिष्टले गाउँपालिकाको वडा नं. ४ र ५ पुरै पहिरोग्रस्त भएकाले मानिसलाई राख्ने ठाउँकै समस्या परेको बताए ।
उनले गाउँको कुनै ठाउँमा पनि मानिस राख्न नसकिने अवस्था आएकाले नयाँ ठाउँको खोजी गरी उनीहरुलाई राख्नुपर्ने बताए । रास्कोट नगरपालिका प्रमुख कासीचन्द्र बरालले जिल्लाको ९ वटै पालिकाको बाढी पहिरोको जोखिमको अवस्था बुझ्न संघिय सरकारलाई भु-गर्भिविद खटाइदिन आग्रह गर्नुपर्ने बताए । उनले रास्कोटमा अहिलेसम्म कल्पना नगरिएको विपद् आएको बताए । 
बैठकमा राजनीतिक दलहरुले बाढी र पहिरो पीडितलाई तत्काल राहत र सुरक्षित स्थानान्तरण गर्न माग गरेका छन् । नेपाली कांग्रेसका नेता भुपेन्द्रजंग शाही, नेकपाका नेता नगिन्द्र शाही नेशनल, समाजबादी पार्टीका नेता नरेन्द्रबहादुर शाही लगायतका नेताहरुले स्थानिय सरकारदेखी संघिय सरकारसम्मका तीनवैट सरकारले बाढी र पहिरो पीडितलाई रातह र सुरक्षितठाउँमा स्थानान्तरण गर्न ढिलाइ गरेको भन्दै नागरिकलाई विपद्का बेला सरकार भएको महसुस दिलाउन माग गरेका हुन् । बैठकमा जिल्ला स्तरका गैरसरकारी संस्थाका प्रमुख भिडिसेफ नेपालका अध्यक्ष मीनबहादुर बोगटी, हुरेण्डेकका उपाध्यक्ष बिरेन्द्र बुढा, रेड्क्रसका सभापती बलप्रसाद संज्याल लगायतले आफ्नो संस्थागत सहयोगका विषयमा जानकारी गराएका थिए ।
प्रतिक्रिया दिनुहोस !
