ललितपुर : कोरोना संक्रमणबाट गत शुक्रबार ललितपुर–१४ थसिखेलकी ६७ वर्षीया महिलाको मृत्यु भयो । वीरगन्जबाट फर्किएको केही समयपछि मृतक महिलालाई कोरोना पुष्टि भएको थियो ।
उनको परिवारका अन्य पाँच जनालाई पनि कोरोना पोजेटिभ देखिएको स्वास्थ्य कार्यालय ललितपुरले जनाएको छ । कार्यालय प्रमुख खगेश्वर गेलालका अनुसार ती महिला तराईबाट आएपछि क्वारेन्टाइनमा बसिनन् । घर बस्दा न्यूनतम स्वास्थ्य सावधानी पनि नअपनाइएकाले सो परिवारका अन्यलाई पनि संक्रमण भएको थियो । वीरगन्जबाट आएको केही दिनमा कोरोनाका लक्षण देखिन थालेपछि मात्रै ती महिला अस्पताल पुगेकी थिइन् ।
उनी उच्च रक्तचापको बिरामीसमेत थिइन् । कोरोना संक्रमण पुष्टि भएको केही दिनमा पाटन अस्पतालमा उनको मृत्यु भयो । तराईबाट आएर परिवारका सदस्यसँगको घुलमिल र हेलचेक्र्याइँले अन्यमा समेत संक्रमण देखिएको गेलालको भनाइ छ । ‘क्वारेन्टाइन नबस्दा र परिवारका सबै सदस्य घुलमिल हुँदा समस्या देखियो’, उनले भने, ‘कोरोना परीक्षण पनि भएको थिएन, हेलचेक्र्याइँले ज्यानसमेत लिन सक्छ ।’
कोरोना संक्रमणबाट ललितपुरमा मृत्यु हुने ती महिल दोस्रो व्यक्ति हुन् । यसअघि ललितपुर–२२ बुङमतीका एक पुरुषको मृत्यु भएको थियो । स्वास्थ्य क्षेत्रमा काम गर्नेले अहिलेको संक्रमणका बेला झनै बढी सावधानी अपनाउनुपर्ने चिकित्सक बताउँछन् । गत महिना काठमाडौंको बल्खुस्थित बयोधा अस्पतालमा ल्याब टेक्निसियनको रूपमा कार्यरत ललितपुर लुभुकी एक युवतीको घरका १३ जना सदस्यलाई कोरोना संक्रमण देखिएको थियो । उतm घटनापछि समाजले गर्ने विभेदका कारण आफूले मानसिक यातना भोग्नु परेको ती युवती बताउँछिन् । सो परिवार हाल कोरोना मुक्त भइसकेको महालक्ष्मी नगरका मेयर रामेश्वर श्रेष्ठले जानकारी दिए ।
ललितपुरमा बिहीबार मात्रै १० जना संक्रमित थपिएका छन् । हालसम्म १ सय ३० जना कोरोना संक्रमित देखिएका छन् । ६ जनाको मृत्यु भएको छ । बुङमतीका पुरुष र थसिखेलकी महिलाबाहेक अन्य ललितपुरमा अस्थायी बसोबास गर्नेहरू हुन् । गेलालका अनुसार पहिला करिब ९८ प्रतिशत लक्षण नभएका बिरामी थिए भने हाल आईसीयूमा भर्ना गर्नुपर्ने खालका संक्रमित बढेका छन् । ‘पहिला आईसीयू भेन्टिलेटरमा राख्नै पर्दैनथ्यो, अहिले पाटन अस्पतालमा दुई, तीन जना आईसीयूमा छन्’, उनले भने । अहिलेसम्म ललितपुरका सबै स्थानीय तहमा कोरोना संक्रमण देखिएकोमा सबैभन्दा धेरै जोखिम ललितपुर महानगरपालिकामा रहेको छ । दोस्रोमा महालक्ष्मी नगर र तेस्रोमा गोदावरी नगरपालिकामा खतरा बढेको छ । सरकारले लकडाउन खुला गरेसँगै आम मानिसले सावधानी नअपनाउँदा संक्रमणको जोखिम कायम रहेको विज्ञहरूको बुझाइ छ ।
प्रतिक्रिया दिनुहोस !
