नुवाकोट : नुवाकोटमा शुक्रबार एकैदिन सातजनामा कोरोना भाइरस (कोभिड-१९) संक्रमण पुष्टि भएको छ । विदुर नगरपालिका क्षेत्रका ६ र एकजना गरी सातजनामा पन्चकन्या गाउँपालिकाका संक्रमित पुष्टि भएको हो ।
यसअघि पहिचान भएका संक्रमितको 'कन्ट्रयाकट्रेसिङ' को क्रममा सातजनामा कोरोना भाइरसको संक्रमण फेला परेको स्वास्थ्य कार्यालय नुवाकोटले जनाएको छ । स्वास्थ्य कार्यालय नुवाकोटका प्रमुख सागरप्रसाद घिमिरेका अनुसार काठमाडौं पठाएको स्वाब परीक्षणमा विदुर नगरपालिकाका ६ जना र पञ्चकन्या गाउँपालिकाका १ जनामा कोरोना भाइरसको संक्रमण पुष्टि भएको हो । उनीहरुलाई अस्पताल लैजाने तयारी भइरहेको छ ।
संक्रमितमध्ये एकजना स्वास्थ्यकर्मी र एकजना सेनामा कार्यरत व्यक्ति रहेका छन् । नुवाकोट जिल्ला अस्पताल त्रिशूलीका एकजना स्वास्थ्य सहायक र सेनाको गणमा कार्यरत एकजना सिपाही रहेको जनाइएको छ । यससँगै नुवाकोटका ५३ जना कोरोना भाइरसबाट संक्रमित भएका छन् ।
३६ जना संक्रमित उपचारपछि घर फर्किएका छन् । १० जना अस्पतालको आइसोलेसनमा उपचार गराइरहेका छन् । पाँचजना नुवाकोट जिल्ला अस्पताल त्रिशूली र ५ जनाको काठमाडौंमा उपचार भइरहेको छ ।
एकैपटक समुदायस्तरका सातजनामा कोरोना संक्रमण फेला परेपछि नुवाकोट थप असुरक्षित र जोखिमपूर्ण भएको छ । नुवाकोटमा अत्यावश्यक बाहेकका सेवालाई कम गरिएपनि संक्रमणको बढ्दो संख्याले सर्वसाधारणमा त्रास सृजना गरेको छ ।
यसअघि पनि बिहीबार काठमाडौंको वीर अस्पतालमा गरिएको स्वाबको नमूना परीक्षणमा लिखु गाउँपालिका घर भएका ३० वर्षीय पुरुषमा कोरोना संक्रमण पुष्टि भएको थियो । लिखुमा पहिलो पटक कोरोना संक्रमण देखिएको हो ।
योसँगै जिल्लामा कोरोना संक्रमितको कुल संख्या ५३ पुगेको स्वास्थ्य कार्यालय नुवाकोटका प्रमुख सागरप्रसाद घिमिरेले जानकारी दिए । उनका अनुसार हाल आइसोलेसनमा रहेका सबैको स्वास्थ्य अवस्था सामान्य रहेको छ ।नुवाकोटमा हालसम्म ३६ संक्रमित स्वास्थ्य उपचारपछि निको भएर घर फर्किएका छन् ।
प्रतिक्रिया दिनुहोस !
