उदयश्री युथ क्लब फुटबल र भलिबल प्रतियोगिताको च्याम्पियन
साउन २७, २०७७ मंगलबार १६:४६:०
जोमसोम : उपल्लो मुस्ताङको खेलकुद क्षेत्रको विकास तथा त्यसको प्रर्वद्धनका लागि आयोजना भएको दोश्रो लोछ्योग्यल झिग्मे मेमोरिलय कप प्रतियोगिता सोमबार सम्पन्न भएको छ ।
गत श्रावण १७ गते देखि १० सम्म जारी प्रतियोगिताको फुटबल र भलिबलको दुबै खेलको उपाधि लोघेकर दामोदरकुण्ड गाउँपालिका -३ घिलिङको उदयश्री युथ क्लबले जित्दै च्याम्पियन बनेको हो ।
समुन्द्री सतहदेखि करिब ५५ सय मिटरको उचाइमा रहेको लोमान्थाङ गाउँपालिका -३ ठिङ्गर खेलमैदानमा प्रतियोगिता आयोजक माउन्टेन पासाङ युथ क्लब ठिङ्गरले संञ्चालन गरेको फुटबलको फाइनल खेलमा उदय श्री युथ क्लब घिलिङले स्नोल्याण्ड युथ क्लब फुवालाई टाइब्रेकरमा ८-६ गोल अन्तरले हराउँदै च्याम्पियन बन्यो ।
निर्धारित ९० मिनेटको खेलमा दुबै पक्षबाट गोल नभएपछि खेल अतिरिक्त समयमा धकेलिएको थियो । त्यसपछि थपिएको ३० मिनेटमा पनि दुबै टिमबाट गोल हुन नसकेपछि खेल टाइब्रेकरमा पुगेको थियो ।
यस्तै, भलिबलतर्फको खेलमा उदय श्री युथ क्लब घिलिङले बुद्ध शान्ति युथ क्लब चराङलाई ३-१ को सेटमा पराजित गर्दै च्याम्पियन बन्यो । फुटबलतर्फ च्याम्पियन बनेको उदय श्री युथ क्लबले नगद ७५ हजारसहित शिल्ड ,मेडल र प्रमाणपत्र प्राप्त गर्यो भने उपबिजेतामा चित्त बुझाएको स्नोल्याण्ड युथ क्लब फुवाले नगद ५० हजारसहित शिल्ड ,मेडल र प्रमाणपत्र पायो ।
यस्तै ,भलिबलतर्फ च्याम्पियन बनेको उदय श्री युथ क्लब घिलिङले नगद ५० हजारसहित शिल्ड ,मेडल र प्रमाणपत्र प्राप्त गर्यो भने उपबिजेता बुद्ध शान्ति युथ क्लब चराङले नगद २५ हजारसहित शिल्ड ,मेडल र प्रमाणपत्र पाएको छ ।
उपल्लो मुस्ताङको लोछोदिन क्षेत्रका २ स्थानीय तहका विभिन्न युवा क्लव सम्मिलित प्रतियोगिताको फुटबल र भलिबल खेलमा कुल १४ टिमले सहभागिता जनाएको लोघेकर दामोदरकुण्ड गाउपालिकाका अध्यक्ष लोप्साङ छोम्फेल बिष्टले जानकारी दिए । उपल्लो मुस्ताङको खेलकुद तथा सास्कृतिक विकास र त्यसको संरक्षण तथा प्रर्वद्धनमा जिग्मे फाउन्डेसनले महत्वपूर्ण योगदान पुर्याएको छ ।
खेलकुदकै विकासका माध्यमले लोछोदिन क्षेत्रका युवाहरुको प्रगाढ सम्वन्ध विस्तार गर्दै खेल जनशक्ति उत्पादन गर्ने उद्देश्यले उपल्लो मुस्ताङमा बर्सेनि आलोपालो गाउबाट जिग्मे मेमोरिलय कप आयोजना गरिने गरिएको छ । यसपटक दोश्रो संस्करणको प्रतियोगिता सञ्चालनको जिम्मा माउन्टेन पासाङ युथ क्लवले पाएको हो ।
जिग्मे मेमोरिलय कप प्रतियोगितामा विभिन्न अतिरिक्त खेल तथा विविध सास्कृतिक नृत्य समेत देखाईएको छ । प्रतियोगिताको दौरानमा हिमाली संस्कृति झल्किने गीत र नृत्य प्रस्तुत गरिएको छ । खेलसँगै संस्कृति जोड्ने उद्देश्यले लोछोदिनका विभिन्न क्लवले सांस्कृतिक भेषभुषा प्रर्दशन गरे । यसपटक आयोजक लो-छ्योग्याल जिग्मे मेमोरियल कप आयोजक माउण्ट पासाङले विश्व व्यापी माहामारीको रुपमा फैलिएको नोवल कोरोना भाइरस ( कोभिड—१९ ) को रोकथामका लागि सामाजिक दुरी कायम गरी प्रतियोगिता सम्पन्न गरेको जनाएको छ ।
यसअघि उपल्लो मुस्ताङमा जारी प्रतियोगिताको संघीय सांसद प्रेमप्रसाद तुलाचनले उद्घाटन गरेका थिए । उनले उपल्लो मुस्ताङलाई सांस्कृतिक हवको मात्र नभई खेलकुद हबको रुपमा समेत विकास गर्नुपर्ने जनाए । उनले उपल्लो मुस्ताङमा राष्ट्रिय गौरवको आयोजना बेनी—जोमसोम—कोरला सडक बिस्तार भइरहेको र यहा हाइअल्टिच्युड खेलकुदको पर्याप्त सम्भावना भएको बताए ।
उपल्लो मुस्ताङको खेलकुद प्रर्वद्धनमा सक्दो प्रयास गर्ने सांसद तुलाचनको भनाई छ ।यस्तै ,प्रतियोगिताको समापन समारोहमा जिसस प्रमुख छिरिङ ल्हामो गुरुङ ,लोमान्थाङ गाउपालिकाका अध्यक्ष सुवर्णकुमार बिष्ट ,लोघेकर दामोदरकुण्ड गापा अध्यक्ष लोप्साङ छोम्फेल बिष्ट लगायतको उपस्थित थिए । उनीहरुले प्रतियोगिताका बिजेता र उपबिजेता टिमलाई नगद ,शिल्ड,मेडल र प्रमाणपत्रले सम्मान गरे ।
प्रतिक्रिया दिनुहोस !
