बागलुङ : शुक्रबार राति अविरल वर्षासँगै आएको पहिरोले निसीखोला गाउँपालिकामा घर पुरिँदा तीन जनाको मृत्यु भएको छ। कारीगाउँमा बालको र धारखर्कमा एक वृद्धाको पहिरोमा परी मृत्यु भएको प्रहरीले जनाएको छ ।
निसीखोला गाउँपालिका-५ कारीगाउँमा स्थानीय हिराबहादुर विकको घर भत्किएर पुरिँदा उनका १३ वर्षीय छोरा देवेन्द्र र ६ वर्षीय नाती प्रवेशको ज्यान गएको हो। पहिरोमा परी विककी श्रीमती ५३ वर्षीया बिलसरा विक घाइते भएकी छिन् । उनको उद्धार गरी उपचारका लागि झिवाखोला पठाइएको निसी प्रहरी चौकीका प्रहरी सहायक निरीक्षक लालमणी भट्टराईले जानकारी दिए। घरको माथिल्लो तलामा सुतेका परिवारका अरु भने सकुशल छन् ।
यसैगरी, वडा नम्बर ३ को धारखर्कमा पहिरोले पुरिएर एक महिलाको पनि ज्यान गएको छ । निरन्तरको वर्षापछि घर माथिबाट आएको पहिरोले घर भत्किँदा स्थानीय जुठे कामीकी श्रीमती ७२ वर्षीया वली कामीको मृत्यु भएको निसीखोला गाउँपालिका–३ का वडा अध्यक्ष जुनविक्रम शाहीले जानकारी दिए । निसीखोलामा केही दिनअघि पनि पहिरोले घर पुरिँदा एक बालकको ज्यान गएको थियो ।
प्रतिक्रिया दिनुहोस !
