दाङ : स्वास्थ्य पहुँचबाट टाढा रहेका दाङका श्रमिक र मजदुरहरुलाई कोरोना संक्रमणबाट जोगाउन स्वास्थ्य सुरक्षा सामग्री प्रदान गरिएको छ ।
दाङको तुलसीपुरमा विभिन्न क्षेत्रमा श्रमिकको रुपमा काम गर्दै २ सय ५० जनालाई के एन नाइटी फाइभ मास्क, सेनिटाइजर र वर्किङ ग्लोब्स प्रदान गरिएको हो ।
युवाहरुको सामाजिक सस्था रोट्याक्ट क्लब तुलसीपुरको अगुवाई तथा रोटेटरी क्लबको सहभागितामा २ सय ५० श्रमिकलाई स्वास्थ्य सुरक्षा सामग्री प्रदान गरिएको रोट्याक्ट तुलसीपुरका अध्यक्ष प्रमिश लामिछानेले जानकारी दिए ।
श्रमिकहरु सुरक्षित भएमा समुदाय र अन्य व्यक्तिहरु कोरोनाबाट सहजै सुरक्षित हुनसक्ने भएका कारण विभिन्न क्षेत्रमा जमदुरी गर्ने न्युन ज्यालाका श्रमिकहरुलाई स्वास्थ्य र सुरक्षा सामग्री सहयोग गरिएको अध्यक्ष लामिछानेले बताए ।
क्लवले रिक्सा मजदुर, ट्रान्सपोर्ट मजदुर, ज्यालादरी गर्ने मजदुर, पूर्वाधारमा काम गर्ने मजदुर र गाडीमा काम गर्ने मजदुरलाई कार्यस्थलमै पुगेर सहयोग गरेको हो । 'सामाजिक उत्तरदायित्व अन्तरगत हामीले यो काम गरेका छौँ,' अध्यक्ष लामिछानेले भने ।
सहयोगसँगै कोरोना सचेतना र जानकारी समेत गराइरहेको उनले बताए । सबै नागरिकले स्वास्थ्य सुरक्षामा ध्यान दिएमा मात्रै कोरोनाको जोखिमबाट बच्न सकिने हुँदा, स्वास्थ्य सुरक्षाको पहुँचमा पुग्न नसकेका मजदुरलाई यो सहयोग गरेको उनले बताए ।
प्रतिक्रिया दिनुहोस !
