आमा-छोरासहित तीनजनामा कोरोना संक्रमण, बागलुङमा संक्रमितको संख्या २ सय ७१ पुग्यो
भदौ २, २०७७ मंगलबार ११:१८:०
बागलुङ : जिल्लाको बरेङ गाउँपालिकामा आमा-छोरासहित थप तीनजनामा कोरोना संक्रमण पुष्टि भएको छ ।क्षयरोग उपचार केन्द्र पोखरामा गरिएको परीक्षणमा बरेङ गाउँपालिका २ का २५ वर्षीया महिला, उनका ६ वर्षीय छोरा र बागलुङ नगरपालिका वडा नम्बर १३ का २६ वर्षीय पुरुषमा संक्रमण पुष्टि भएको स्वास्थ्य कार्यालय बागलुङ प्रमुख सुरज गुरौले जानकारी दिए ।
संक्रमित महिलाका श्रीमान र कान्छो छोराको भने नेगेटिभ रिपोर्ट आएको उनले बताए । संक्रमित पुष्टि भएका सबै भारतबाट आएका हुन् । ६ वर्षीय बालक र उनकी आमा गत साउन २७ गते भारतबाट आएर बरेङ गाउँपालिकाको क्वारेन्टाइनमा बसेका छन् भने बागलुङ नगरपालिका वडा नम्बर १३ का युवा पनि भारतबाट आएर बानपा १ को क्वारेन्टिनमा छन् ।
संक्रमित बालक र महिलाका श्रीमान र जेठा छोरासँगै यात्रा गरेर क्वारेन्टिनमा बसे पनि बाबु छोरामा भने कोरोना नदेखिएको कार्यालय प्रमुख गुरौले बताए । तर सँगै बसेकाले महिला र बालकलाई आइसोलेसमा ल्याइने र उनका श्रीमान र छोरालाई क्वारेन्टिनमै राखेर दुवैको पुनः स्वाब लिइने गुरौले जानकारी दिए ।
योसँगै जिल्लामा संक्रमितको संख्या २ सय ७१ पुगेको छ । जसमध्ये २ सय ४६ जना निको भएर घर फर्किसकेका छन् भने एक युवकको मृत्यु भएको छ ।
प्रतिक्रिया दिनुहोस !
