'एम्बुलेन्स मर्मत गर्नै मान्दैनन्, बिरामी कसरी बोक्ने ?'
भदौ ११, २०७७ बिहीबार १५:३:०
परासी : पछाडिको टायरमा समस्या आएपछि पश्चिम नवलपरासीका एम्बुलेन्स चालक कृष्ण सहानी बुधबार दिउँसो एम्बुलेन्स मर्मत गर्न बुटवलस्थित मैनाबगर पुगे । बिरामी छोडेर फर्कने क्रममा गाडीमा समस्या आएपछि मर्मतका लागि ग्यारेज क्षेत्रमा जाने क्रममा प्रवेश गर्ने स्थानबाटै फकाइएको सहानीले बताए ।
कोरोना संक्रमित बिरामी बोक्ने भन्दै एम्बुलेन्सलाई ग्यारेज क्षेत्रमा प्रवेश गर्न नदिएको उनको भनाइ छ । मैनाबगरमा सवारीसाधनको मर्मत तथा अन्य काम गर्न ग्यारेजहरु छन् । ग्यारेज क्षेत्रमा प्रवेश गर्न नदिएपछि नेपालगञ्ज रोडमा मिस्त्री बोलाएर एम्बुलेन्स बनाएर फर्केको सहानीले बताए ।
सरकारले कुनै पनि एम्बुलेन्स चालकलाई स्वास्थ्य सामग्रीसमेत उपलब्ध नगराएको उनले बताए । 'सरकारले बिरामी नबोक्ने एम्बुलेन्सलाई कारबाही गर्ने भन्छ । बिग्रिएको छ भन्दा बहाना बनाएको भन्छ,' मर्मत गर्न ग्यारेजवाला मान्दैनन् । एम्बुलेन्स बिग्रिएपछि बिरामी कसरी बोक्ने ? हामी दोहोरो चपेटामा पर्यौं।'
संयुक्त एम्बुलेन्स चालक संघ नवलपरासीका जिल्ला अध्यक्षसमेत रहेका सहानीले गुनासो गरे । लामोदुरीमा जाँदा पानी किन्न जाने क्रममा पसलेहरुले कोरोना संक्रमित बोक्छन् भन्दै पानी समेत नदिएको तितो अनुभव सहानीले सुनाए ।
सुनवल नगरपालिकाले स्थानीय स्तरमा बनाइएका केही थान पीपीइ र प्रदेश ५ को उद्योग वाणिज्य महासंघले पञ्जा र ग्लोब्स दिएपनि त्यसबाहेक संघदेखि स्थानीय कुनै पनि सरकारले आफूहरुलाई सहयोग नगरेको उनको गुनासो छ । 'पीपीइको त कुरै नगर्नुस्, सामान्य मास्क र पञ्जासमेत पाइएको छैन । केही साथीहरुले चिनेका सँग मागेका छन् । केहीले आफैले किनेर काम चलाएका छन्, ' उनले भने ।
जिल्लामा २५ वटा एम्बुलेन्स छन् । तीमध्ये पृथ्वीचन्द्र जिल्ला अस्पताल, सरावल र पाल्हीनन्दन गाउँपालिकाको एम्बुलेन्स कोरोना संक्रमित बिरामी बोक्दै आएका छन्। एकपटक बिरामी बोकेपछि एक हप्तासम्म सेनिटाइजर गरेर एम्बुलेन्स राख्ने गरिएको छ । सरकारकै निर्देशन बमोजिम जिल्लाका अधिकांश एम्बुलेन्सलाई पाटेसन गरेर चलाएको उनले बताए ।
आफ्नो स्वास्थ्यको समेत वास्ता नगरी संक्रमितलाई बोक्दा समेत कसैले सहयोग नगर्दा चालक दुःखित भएको उनको गुनासो छ । प्रयाप्त स्वास्थ्य सामग्रीसहितको सुरक्षा व्यवस्था गरिदिन चालकहरुले सरकारसँग माग गरेका छन् ।
प्रतिक्रिया दिनुहोस !
