दाङ : समुदाय स्तरमा कोरोनाको संक्रमण देखिन थालेपछि दाङमा पीसीआर परीक्षणको लागि ‘अन द स्पर्ट’ स्वाब संकलन थालिएको छ। दाङमा समुदायस्तरमा कोरोना संक्रमण देखिएपछि स्थानीय सरकारको अगुवाइमा परीक्षण बढाउन थालिएको हो।
तुलसीपुर उपमहानगरपालिका, घोराही उपमहानगरपालिका र गढवा गाउँपालिकाका समुदायस्तरमा कोरोनो संक्रमण देखिएको पुष्टि भएपछि जिल्लामा उच्च सर्तकता अपनाउन र समुदायको वास्तविक अवस्था बुझन स्थानीय सरकार सक्रियता देखाउन लागेका हुन्।
शुक्रबारदेखि ‘अन द स्पर्ट’ स्वाब संकलन सुरु गरेको छ। नगरको स्वास्थ्य शाखा, विपद व्यवस्थापन शाखाको अगुवाइमा तुलसीपुरका चौक—चौकमा स्वाब संकलन गरिएको छ।
समुदायमा संक्रमणको यथार्थ अवस्था बुझन हामीले रेन्डमली ‘अन द स्पर्ट’ स्वाब संकलन अभियान चलाएका छौँ’, तुलसीपुर उपमहानगरपालिका विपद् शाखा प्रमुख भीमप्रकास खत्रीले भने, ‘यो हाम्रो अभियान नेपालमै पहिलो हो भन्ने लागेको छ। विपन्न, गरीब र गरिखाने वर्गसम्ममा पीसीआर परीक्षण पुर्याउन र समुदायलाई सचेत गराउन यस्तो गरिएको उनले बताए। यो अमुना अभियान हो’, उनले भने, ‘हामीले उहाँहरुकै घर दैलोमा पुगेर परीक्षण गर्न लागेका छौँ, भीडभाड हुने ठाउँमा परीक्षण गरिरहेका छौँ, त्यहाँ कोरोना छ छैन भनेर अब वास्तविकता आउने छ।’
उपमहानगरपालिकाका स्वास्थ्य महाशाखाका जनस्वास्थ्य निरीक्षण तथा कोरोना फोकल पर्सन विमल केसीले बजार क्षेत्रका भीडभाड हुने क्षेत्र, र त्यससँग सम्बन्ध व्यक्तिलाई परीक्षणको दायरामा ल्याउन लागिएको बताए।
तुलसीपुरमा ४ वटा कोरोनाका केस सामुदायिक स्तरको देखिएपछि प्रत्येक चौकमा ८/१० जनाको स्वाब संकलन गरिराखिएको जनस्वास्थ्य निरीक्षक केसीले बताए। अहिलेसम्म तुलसीपुरमा स्याम्पलिङको रुपमा ३ सयजना समुदायका व्यक्तिको पीसीआर परीक्षण गरिसकिएको बताए।
सडक व्यापारी रामकली सुनारले एकाएक आएर कोरोना परीक्षण भइएकोमा आश्चार्य लागेको बताइन। ‘मलाई यो जाँच गराउँन मन त लागेको थियो,’ उनले भनिन्, ‘कहाँ र कसलाई गएर भन्ने थाहा थिएन। आज आफैँ आएर परीक्षण गर्नुभयो खुशी लागेको छ।’ दाङमा अहिलेसम्म ७ सय ५६ जनामा कोरोना संक्रमण पुष्टि भएको छ।
प्रतिक्रिया दिनुहोस !
