बेपत्ता पूर्वराजदूत मोरिसको शव फेला
लण्डन : बेपत्ता भएको झण्डै चार महिनापछि नेपालका लागि बेलायती पूर्वराजदूत रिचर्ड मोरिसको शव फेला परेको छ । गत मे ६ देखि बेपत्ता मोरिसको खोजीमा जुटेको ह्याम्पशायर प्रहरीले सोमबार उनको शव एलिस होल्ट जंगलमा फेला पारेको बताएको छ ।शवको औपचारिक सनाखत प्रक्रिया पूरा भइनसके पनि प्रहरीले उनको परिवारलाई अवगत गराइसकेको छ ।
प्रहरीले मोरिसको मृत्युलाई शंकास्पद मानेको छैन् । बेलायतको फार्नहमनजिक बेन्टली क्षेत्रमा बस्दै आएका ५२ वर्षीय पूर्व राजदूत मोरिस गत मे ६ तारिख बिहान मोर्निङ वाकमा निस्केपछि बेपत्ता भएका थिए ।
उनी बेपत्ता भएपछि बेलायती प्रहरीले व्यापक खोजी अभियान चलाएपनि उनको बारेमा पत्ता लगाउन सकेको थिएन । स्थानीय जंगल, नदी किनारामा व्यापक खोजी गरेको प्रहरीले छरछिमेकका वासिन्दाका घरका बगैंचा, भण्डार गृह, शेड देखि स्थानीयहरुबाट सीसीटिभी फुटेजसम्म जुटाएर खोजीको प्रयास गरेको थियो । मोरिसको परिवारमा श्रीमती र तीनजना छोराछोरी छन्।
नेपालका असल मित्र थिए मोरिस
मोरिसले नोभेम्बर २०१५ देखि नोभेम्बर २०१९ सम्म नेपालमा बेलायती राजदूतको रुपमा जिम्मेवारी निर्वाह गरेका थिए । ब्रिटिश सरकारले उनलाई फिजी गणतन्त्रका लागि जुलाइ महिनादेखि कार्यभार सम्हाल्ने गरि उच्चायुक्त तोकेको थियो ।
स्वर्गीय रिचर्ड मोरिसलाई बेलायती सञ्चारमाध्यमहरुले टप ब्रिटिश डिप्लोम्याट ( बेलायती उच्च कूटनीतिज्ञ) भनेका छन् । सन् २०१५ मा नेपालको राजदूत नियुक्त हुनुअघि पनि उनले बेलायत सरकारका महत्वपुर्ण जिम्मेवारीहरु सम्हालिसकेका थिए ।
बेलायती विदेश मन्त्रालयको प्यासिफिक मामिला हेर्ने विभागको प्रमुखका रुपमा काम गरेका उनले अष्ट्रेलियामा कन्सुलर जनरलको भूमिका पनि निभाएका थिए । चार वर्ष नेपालको लागि बेलायती राजदूतको जिम्मेवारीमा रहँदा स्वर्गीय मोरिसले नेपाल र नेपालीहरुसँग घनिष्ठ सम्बन्ध बनाएका थिए । नेपाललाई औधि माया गर्ने उनले महाभूकम्पपछि बेलायती राजकुमार हयारीको नेपाल भ्रमण संयोजनमा प्रभावकारी भूमिका निर्वाह गरेका थिए ।
विशेष गरि ब्रिटेन नेपाल च्याम्बर अफ कमर्स ( बिएनसिसी) प्रतिनिधिसंग निकट थिए मोरिस । नेपाल र बेलायतबीचको लगानी तथा व्यापार प्रवद्र्धनका लागि कैयौं प्रोजेक्टमा उनीसंग सहकार्य गरेका बिएनसिसीका निवर्तमान अध्यक्ष राजन कंडेलले मोरिसलाई नेपालका एक असल मित्रका रुपमा सम्झिन्छन् ।
अहिलेसम्म बेलायतबाट नेपाल गएका बेलायती राजदूतहरुमध्येकै उत्कृष्ट थिए रिचर्ड । नेपाललाई साँच्चीकै माया गर्ने एक असल मित्र, कँडेलले भने,' उनको निधन बेलायत र नेपाल दुवै देशका लागि ठूलो क्षति हो ।'