बाढी प्रभावित क्षेत्र ढोरपाटन हिँडेका गृहमन्त्री बाटैबाट फिर्ता

बागलुङ : बाढी प्रभावित क्षेत्र जिल्लाको ढोरपाटन नगरपालिकामा राहत सहित हिँडेका गृहमन्त्री रामबहादुर थापा बादलसहितको टोली बीच बाटोबाटै फिर्ता भएको छ ।  बुधबार राती भुजीखोलामा बाढीले पुर्‍याएको क्षतिबारे स्थलगत जानकारी लिन नेपाली सेनाको हेलिकप्टरमार्फत उडेका गृहमन्त्री थापा मौमस खराबी पछि स्याङ्जाको आकाशबाटै पोखरा विमानस्थलमा आकस्मिक अवतरण गरेका थिए । 

गृहमन्त्रीसहितको टोली चढेको हेलिकप्टर अत्याधिक वर्षाका कारण मौसमले साथ नदिएपछि बीच बाटोबाटै पोखरा फर्किएको  थियो । पोखरा विमानस्थलमा दिउँसो साढे १ बजे सम्म मौसम खुल्ने प्रतिक्षामा बसे पनि त्यो सम्भावना नदेखिए पछि काठमाण्डौ फर्किएको गृहमन्त्री थापाका प्रेस सल्लाहकार किरणराज भट्टराइले जानकारी दिए । नेकपा सचिवालय सदस्य समेत रहेका गृहमन्त्री थापा दिउँसो ३ बजे सचिवालय बैठकमा सहभागी हुनेछन् । 

नेपाली सेनाको हेलिकप्टरमा गृहमन्त्री थापा र सांसद पौडेलसहित विपत विज्ञ, स्वास्थ्यकर्मी सहित ११ जनाको टोली सवार थियो । बाढीका कारण ढोरपाटनमा १३ जनाको ज्यान गएको छ भने ३० भन्दा बढी बेपत्ता छन् । ३१ घर बगाएको प्रहरीले जनाएको छ । घटनास्थलमा अहिले जिल्ला प्रहरी, नेपाली सेना र स्थानीयद्वारा खोजी तथा उद्धारको प्रयास जारी रहेको प्रमुख जिल्ला अधिकारी सुरेश न्यौपानेले जानकारी दिए ।