निषेधाज्ञाको अवज्ञा गर्दै नवलपरासीमा धर्ना
परासी : निषेधाज्ञाको अवज्ञा गर्दै पश्चिम नवलपरासीका राजनीतिक दलहरुले मंगलबार सदरमुकाम परासीमा धर्ना दिएका छन् । कोरोना संक्रमणको कारण देखाउँदै मृत्यु भएको घटना शंकास्पद रहेको भन्दै घटनाको छानविन गरी दोषिलाई कारवाहीको माग गर्दै जिल्ला प्रशासन कार्यालय अगाडि धर्ना दिएका हुन् ।
नेपाली कांग्रेसका जिल्ला उपभासभापति ३८ वर्षीय सुवाचन्द्र गिरीको साउन २३ गते भैरहवास्थित युनिभर्सल कलेज अफ मेडिकल साइन्सेसमा पित्तथैलीको अपरेशन गरिएको थियो । अपरेशनपछि कोराना संक्रमण देखिएका उनको उपचारका क्रममा भदौ १ गते पाटन अस्पतालमा मृत्यु भएको थियो । सोही घटनाको छानविनको माग गर्दै उनीहरुले धर्ना दिएका हुन् ।
जिल्लाका राजनीतिक दल, स्थानीय तहका प्रमुखसहित बसेको जिल्ला सुरक्षा समितिको बैठकको निर्णयले भेला, जमघट र भीडभाडलाई पूर्ण प्रतिबन्ध लगाउँदै निषेधाज्ञा जारी गरेको छ ।
तर जिल्लाका राजनीतिक दल र जनप्रतिनिधिले नै उक्त निर्णयको अवज्ञा गरेको प्रमुख जिल्ला अधिकारी सागरमणि पाठकले बताए ।'आफैले गरेको निर्णय उल्लंघन गरेर धर्ना दिने सम्बन्धित पक्षले नै जनतालाई के भनेर कार्यान्वयन गराउँलान ? म पनि अचम्मित छु,' प्रजिअ पाठकले भने ।
धर्नामा करिब १ सय जनाको सहभागिता थियो । निषेधाज्ञाको अवज्ञा गरेर धर्नामा बस्न पुगेका सहभागिहरुलाई हटाउन प्रहरी पुगेको थियो । तर आदेश नपाएपछि प्रहरीहरु धर्ना हेरेर बसेका थिए । जिल्लामा दैनिजसो कोरोना संक्रमणका बिरामीहरु बढ्दै गएका छन् ।
मृतक गिरीको पीसीआर नगरी अप्रेशन गर्नु र अप्रेसनमा समेत लापरबाहीको आरोप लगाउँदै राजनीतिक दल र परिवारजनले साता दिनअघि ज्ञापन पत्र दिएर घटनाको निष्पक्ष छानविन गरी कारबाही गर्न माग गरेका थिए । माग पूरा नभएको भन्दै उनीहरुले प्रशासनमा धर्ना दिएका हुन् । धर्नापछि आयोजित कोणसभामा बोल्ने पार्टी प्रतिनिधि र जनप्रतिनिधिले माग पूरा नभए अन्य आन्दोलनका कार्यक्रम गर्ने बताएका थिए ।
धर्नामा नेकपा, नेपाली कांग्रेस, राष्ट्रिय जनता पार्टी, समाजवादी पार्टी, राष्ट्रिय प्रजातन्त्र पार्टी, स्वतन्त्र राजनीतिक समूह, नागरिक समाजका प्रतिनिधिहरुको सहभागिता थियो । त्यस्तै प्रदेशसभा सदस्य बैजनाथ जयसवाल, जिल्ला समन्वय समितिका प्रमुख,रामग्राम नगरपालिकाका प्रमुख, उपप्रमुख, सरावल गाउँपालिकाका प्रमुखको पनि धर्नामा सहभागिता थियो ।