श्रृंखलाबद्ध चोरी : चार लाख रकमसहित चारजना पक्राउ, दिदी-भाइ पनि संलग्न

राजविराज : कोरोना भाइरस (कोभिड–१९) को महामारी नियन्त्रण गर्न लगाइएको लकडाउनमा मौका छोपेर सप्तरीको विभिन्न ठाउँमा श्रृंखलाबद्ध चोरीका घटना हुन थालेका छन् । लकडाउनको सुरुवाती दिनमा चोरी नहुने गरेपनि पछिल्लो दिनहरुमा भने चोरी बढ्न थालेको छ । जिल्ला प्रहरी कार्यालय सप्तरीका मुद्दा शाखाका इन्चार्ज सन्तोष खडकाका अनुसार जिल्लामा सानातिना समेत गरी दैनिकजसो चोरीको घटना हुन थालेको छ ।

दैनिकजसो चोरीको गुनासो प्रहरी कहाँ आउन थालेपछि जिल्ला प्रहरी कार्यालयले आफू मातहतको इलाका प्रहरी कार्यालय र चौकीहरुलाई चोरी नियन्त्रणका लागि प्रहरी परिचालन गरी गस्ती बढाउन निर्देशन दिएको छ ।

राजविराजको मुख्य बजारमा चोरी भएको एक घटनामा सप्तरी प्रहरीले ८ घण्टामै चारजनालाई चार लाख सहित पक्राउ गरी मङ्गलबार सार्वजनिक गरेको छ । घटनालगत्तै विशेष निगरानी गरेर तिब्र अनुसन्धानमा जुटेपछि चोरी कार्यमा संलग्न एक महिलासहित चारजना पक्राउ परेको एसपी राजेन्द्र धमलाले बताए ।

एसपी धमलाका अनुसार पक्राउ पर्नेमा राजविराज नगरपालिका–६ का सैनी भनिने सनिया मण्डल, उनकी दिदी राजविराज– ४ मा बस्ने ज्योतीकुमारी मण्डल सहनी, सोही ठाउँका समिम अन्सारी र सप्तरीको रुपनी गाउँपालिका– ४ का लाल मोहममद राईन छन् ।

उनीहरुलाई ५० हजारको मोबाइल रिचार्ज कार्ड र ३ लाख ६० हजार नगदसहित पक्राउ गरिएको हो । गुडिया (खेलौना) भित्र रिजार्च कार्ड र माटो मुनी कपडामा बेरेर रकम लुकाएको अवस्थामा उनीहरु पक्राउ परेको अनुसन्धानमा खटिएका इन्स्पेक्टर खडकाले बताए ।

प्रहरीका अनुसार सनियाले सोमबार विहान साढे चार बजे राजविराज–७ स्थित मुख्य बजारको गणेश स्टोरबाट चार लाख नगद र साढे एक लाखको रिचार्ज कार्ड चोरी गरेको स्विकारेका छन् । नियमित चोरी घटनामा संलग्न हुने केही व्यक्तिलाई नियन्त्रणमा लिई सोधपुछ गरेपछि प्रहरीले सनियालाई उनको दिदीको घरबाट नियन्त्रणमा लिएको डिएसपी तिलक भारतीले बताए ।

सिसीटिभी क्यामेराको फुटेजका आधारमा समेत चोरीमा संलग्न सनियाको पहिचान भएपछि उनकै वयान अनुसार अन्य आरोपितहरु पक्राउ परेका हुन् । चोरी गरेर आएका सनियाले लगाएको कपडा परिवर्तन गरे पनि उसले घाँटी र खुट्टामा लगाएको डोरीका आधारमा पहिचान गरिएको इन्स्पेक्टर खडकाले बताए । 

सोमबार बिहान साढे चार बजे गणेश स्टोर अगाडि रहेको सोलारको पोलबाट सनिया पसले ओमप्रकाश साहको घरमाथि चढे । चोरी गर्ने सनियालाई बाहिर बसेर मानिस आवतजावतको सूचना दिन उनका साथी राईन बसे । सोलारको पोलबाट घरको माथिल्लो तलामा चढेका सनियाले घरपसल धनी साह सुतेको कोठा बाहिरबाट चुकुल लगाए । घरको भुई तल्लामा ओर्लिएर पसल र बाकस (घर्रा)को ताला फुटाई चार लाख नगद र साढे एक लाख मूल्य बराबरको मोबाइल रिचार्ज कार्ड चोरी गरे । चोरी गरी बाहिर निक्लिएका सनियाले पसलको बाहिरबाट समेत चुकुल लगाए ।

प्रहरीका अनुसार दिदी ज्योतीकहाँ बस्ने गरेका सनियालाई नियन्त्रणमा लिएपछि चोरीका समान र रकममध्ये केही ज्योतिकै डेरामा र केही राजविराज– २ स्थित उनको मदिरा पसलमा लुकाएर राखेको अवस्थामा फेला पर्‍यो । ज्योतिकै मदिरा पसलमा काम गर्ने समिमले चोरीको रकम कपडामा बेरी खाल्डो खनी माटोमा गाडेर लुकाएको अवस्थामा भेटियो ।  

बिहान ६ बजे उठनासाथ बाहिरबाट चुकुल लगाएको र चोरी भएको थाहा पाएपछि साहले प्रहरीलाई खबर गरे । घटनास्थल पुगेको प्रहरीले सिसीटिभी क्योमराको फुटेज र चोरी घटनामा सलंग्न व्यक्तिहरुलाई निगरानी राखी सोधपुछ गरेपछि चोरीमा संलग्न चारै जना समातिएको प्रहरीले जनाएको छ ।