इटहरी : इटहरीमा सात दिनभित्र सय बेडको आइसोलेसन निर्माण गरिने भएको छ । इटहरी रंगशालामा निर्मित खेल भवनहरुलाई आइसोलेसन बनाइन लागिएको हो । आइसोलेसनका लागि अहिले भवनसम्म पुग्ने बाटो पुर्ने, बिजुली, पानी लगायतको व्यवस्थापनका कामहरु भइरहेको व्यवस्थापन उपसमिति संयोजक भूपेन्द्र बरालले जानकारी दिए ।
इटहरीमा केही समयअघि क्वारेन्टाइनको व्यवस्थापन गरिए पनि आइसोलेसन भने व्यवस्थापन गरिएको थिएन । कोभिड १९ को महामारी बढ्दै गएपछि इटहरीले पनि छुट्टै आफ्नै आइसोलेसन बनाउन लागेको हो ।
बरालकाअनुसार १२ वटा शौचालय र २ वटा वाथ रुमसहितको आइसोलेसन बन्नेछ । विद्युत्, खानेपानी र शौचालयको काम तीव्र गतीले अघि बढेको छ । वाइफाई र सिसी क्यामेरा जडान गर्ने तयारी छ ।
कोरोना भाइरसको महामारीको कारण खेलहरु ठप्प भएपछि भवनलाई तत्कालका लागि आइसोलेसन बनाइन लागिएको इटहरी उपमहानगरपालिकाले जानकारी दिएको छ । प्रदेश सांसद सर्वध्वज साँवाको प्रमुख आतिथ्यमा बसेको कोभिड रोकथाम, नियन्त्रण तथा व्यवस्थापन नगरस्तरीय समितिको बैठकले आवश्यक स्वास्थ्य जनशक्तिको लागि धरानस्थित बीपी कोइराला स्वास्थ्य विज्ञान प्रतिष्ठानसँग सहयोग मागेको छ ।
सांसद साँवाले आइसोलेसन निर्माणका लागि प्रदेश सरकारले २० लाख रुपैया उपलब्ध गराएको जानकारी दिए । उनले आइसोलेसनका लागि आवश्यक सहयोग प्रदेश र संघीय सरकारमार्फत् उपलब्ध गराउनेसमेत बताए । उपमहानगरका प्रमुख द्वारिकलाल चौधरीले आइसोलेसन इटहरीका लागि आवश्यक भइसकेकोले काम तिव्र रुपमा अघि बढाउन निर्देशन दिएका छन् ।
प्रतिक्रिया दिनुहोस !
