सिन्धुपाल्चोक : बाह्रविसे नगरपालिका-७, घुम्थाङको नागपुजेमा पहिरोले पुरिँदा २२ जना बेपत्ता भएका छन्। अहिलेसम्म दुईजनाको शव भेटिएको छ। पहिरोले १८ घर बगाएको छ।
मृत्यु हुनेमा नागपुजेका ६३ वर्षीया भक्तिमाया श्रेष्ठ र भीरखर्कका जुनु श्रेष्ठ रहेका छन्। दुवै शव फेला परेको जानकारी स्थानीय प्रशासनले दिएको छ। गएरातिको अविरल वर्षासँगै आएको पहिरोले बस्ती पुरिँदा घरमा सुतिरहेका स्थानीय बेपत्ता भएका हुन्।
स्थानीयका अनुसार बिहान करिब पौने चार बजे पहिरो आएको थियो। पहिरोमा पुरिएका परिवारका कोहि पनि सम्पर्कमा नआएकाले कति बेपत्ता भन्ने एकिन गर्न कठिन भएको जिल्ला प्रहरी कार्यालय सिन्धुपाल्चोकका डीएसपी प्रकाश सापकोटाले बताए। नेपाली सेना, नेपाल प्रहरी र सशस्त्र प्रहरी टोली घटनास्थल पुगेर उद्धार कार्य सुरु गरेको सापकोटाको भनाइ छ।
त्यसैगरी भीरखर्कमा कम्तिमा १० घर पुरिएको स्थानीयले जानकारी दिएका छन्। भीरखर्कका पुरिएका घर र बेपत्ता मानिसबारे बुझ्न र उद्धारका लागि प्रहरी घटनास्थलतर्फ जाँदै छ। अहिलेसम्म कति घर पुरिएको हो यकिन विवरण आउन बाँकी रहेको प्रहरीले जनाएको छ।
यता सिन्धुपाल्चोकको बाह्रबिसे नगरपालिका ७ का पहिरो प्रभावितलाई भेट्न सभामुख अग्निप्रसाद सापकोटा घटनास्थलतर्फ आउँदै छन्। उनी काठमाडौंबाट बिहानै सिन्धुपाल्चोकको बाह्रबिसे प्रस्थान गरेका हुन्।
प्रतिक्रिया दिनुहोस !
