दैलेख : कर्णाली प्रदेशका दैलेख सुर्खेतका जंगलमा भ्रमणशील जीवनयापन गर्दै आइरहेका राउटे समुदायका बालबालिकाले बाल दिवस मनाएका छन्। नेपालको सम्पदा र कर्णाली प्रदेशको गहनाको रुपमा चिनिने राउटे समुदायका बालबालिकाहरुले पछिल्लो तीन वर्षदेखि बाल दिवस मनाउँदै आएका हुन्।
आफ्नो हक अधिकारको बारेमा जानकार नभएपनि राउटे समुदायका बालबालिकाहरुले बस्तीमै दिवस मनाएका हुन्। राउटे समुदाय हाल दैलेखको गुराँस गाउँपालिका–८ धानचौरमा बसोबास गर्दै आएका छन्। दिवसका अबसरमा राउटे समुदायका बालबालिका तथा महिलाहरुलाई कपडा तथा सरसफाईका सामग्रीहरु समेत वितरण गरिएको छ।
दिवसका अवसरमा बस्तीमै रमाएका राउटे बालक दिपक शाहीले आफुहरुलाई आफ्ना अधिकारबारे जानकारी नभएको बताए। अधिकारबारे जानकार नभएपनि बाल दिवसमा रमाउन पाउँदा खुसी लागेको उनको भनाई छ। राउटे समुदायका महामुखिया महिनबहादुर शाहीले आफुहरु विस्तारै परिवर्तन हुँदै जाने बताए। ‘भन्ने बित्तिकै हामी कहाँ परिवर्तन हुन्छ र ? उनले भने ‘विस्तारै विस्तारै हुन्छ।’ हाल राउटे समुदायको जनसंख्या एक सय ५० जना छ। ती मध्ये ७४ जना बालबालिका छन्।
राउटे जाति दक्षिण एशियाको एक मात्र भ्रमणशील र फिरन्ते जाती हो। आफूलाई वनको राजा भन्न रुचाउने राउटे नेपालको नागरिक हौं भनेर गाथा गाउँछन्। कर्णाली प्रदेशका जंगलमा भ्रमणशील जीवनयापन गर्दै आइरहेका राउटे समुदाय स्वार्थ विहीन छन्। नेपालको नागरिकता नलिएपनि नेपाली नागरिक हौं भनेर गौरव गर्छन्। 
प्रतिक्रिया दिनुहोस !
