दोलखा : सरकारले बिहीबार अर्थात असोज १ गतेदेखि लामोदूरीको यातायात सञ्चालन गर्ने निर्णय गरेसँगै दोलखाका २ यातायात समितिद्वारा तत्कालका लागि ५० वटा गाडी सञ्चालन गर्ने भएका छन् ।
यात्रु सुरक्षाको न्यूनतम प्रवन्ध मिलाएर रोल्वालिङ र अरनिको यातायात समितिले तत्कालका लागि ५० वटा गाडी सञ्चालनमा ल्याउने जनाएका हुन् । असोज १ गते विश्वकर्मा पूजा पनि रहेको र लामो समयदेखि थन्किएर बसेको बसमा आंशिक मर्मत गर्नुपर्ने र यात्रुहरुको चापको आधारमा गाडी संख्या थप्दै जाने दुबै समितिको योजना छ ।
यात्रुलाई प्रत्येक पटक बसभित्र चढ्दा मास्कसहित अनिवार्य स्यानीटाइजर लगाइ तत्कालका लागि राजधानीबाट ५ वटा र जिल्लाबाट ५ वटा गाडी आवतजावत गराइने रोल्वालिङ यातायात समितिका अध्यक्ष बालकृष्ण आचार्यले बताए । यात्रुको चापको आधारमा गाडी थप्दै जाने योजना रहेको अध्यक्ष आचार्यले बताए ।
तत्काललाई नियमित जसरी सवारी नचलाइने तर राजधानीबाट २० र चरिकोटबाट २० वटा गाडी आवतजावत गराइने अरनिको यातायातका चरिकोटस्थित कर्मचारी रविन चौलागाईले जानकारी दिए । १५ जना यात्रु हुने वित्तिकै गाडील गन्तव्यतर्फ पठाइने योजना रहेको उनले बताए ।
रोल्वालिङ र अरनिको यातायातले बर्दिबास र काँकड भित्ताका लागि पनि बिहीबारबाट एक–एकवटा गाडी पठाउने तयारी गरेको जनाइको छ । सरकारले लामो दूरीका सवारी साधनले स्वास्थ्य मापदण्ड पूरा गरेर ५० प्रतिशत मात्र यात्रु बोक्न र भाडा पनि ५० प्रतिशत बढी लिन पाउने गरी निर्णय गरेको थियो ।
प्रतिक्रिया दिनुहोस !
