दोलखा : केन्द्र विवादको कारण आर्थिक वर्ष सुरु भएको २ महिना वितिसक्दा समेत उत्तरी दोलखाको कालिञ्चोक गाउँपालिकाको बजेट पास हुन सकेको छैन ।करिब ४ वर्षदेखि जारी केन्द्र विवादले विभाजित जनप्रतिनिधिहरुका कारण चालु आर्थिक वर्ष सुरु भएको २ महिना वितिसक्दा समेत बजेट पास हुन नसकेको हो । २०७७ असार २३ गते गाउँपरिषद्मा नीति तथा कार्यक्रम र बजेट प्रस्तुत भएपनि समय अभावका कारण स्थगित परिषद् अहिलेसम्म बस्न सकेको छैन।
गाउँपालिकाको बजेट सार्वजनिक नहुँदा चालु आवमा कार्यान्वयन गर्नुपर्ने विकास, निर्माण, तलब, सामाजिक सुरक्षा भत्तालगायतका कार्यहरु ठप्प भएका छन् । बजेट नआएपछि टेण्डर, उपभोक्ता समिति गठन, स्टिमेट लगायतका काम ठप्प भएपछि कामविहीन बन्न पुगेको कर्मचारीहरुको भनाइ छ ।
कालिञ्चोक गाउँपालिकाका अध्यक्ष विनकुमार थामीले भने आर्थिक वर्ष २०७७/७८ को बजेट पारित भइसकेको तथा खर्च गर्ने सफ्वेयरमा अपलोड गर्ने काम भइरहेको बताए । बजेट अहिलेसम्म सार्वजनिक नहुनाको कारणबारे उपाध्यक्ष कालिका पाठकलाई सोध्दा यो विषयमा अध्यक्षलाई नै सोध्न आग्रह गरिन् ।
गाउँपालिकाको अस्थाई केन्द्र सुनखानीमा नीति तथा कार्यक्रम र बजेट प्रस्तुत भए पछि बैठक स्थगित भएको र अर्को बैठक ५ को बान्द्रेथलीमा बस्ने भनी अध्यक्षले निर्णय सुनाएपछि बैठकमा उपस्थित बहुमत सदस्यले नोट अफ डिसेन्ट लेखेको वडा नम्बर ७ का वडाध्यक्ष चेतबहादुर खड्काले बताए । त्यस पछि बैठक नैं नबसेकाले अध्यक्षले कसरी बजेट पारित गरे आफूलाई थाहा नभएको वडाध्यक्ष खड्काको भनाइ छ ।
बडा नम्बर ३ का वडाध्यक्ष निशान बुढाथोकीले भने २३ गते बैठक स्थगित भएको स्वीकार्दै पछि अन्यत्रै बसेको बैठकबाट बजेट पारित भएको बताए । बजेट पारित गर्ने पक्षमा आफू सहित बहुमत सदस्यको हस्ताक्षर रहेको उनको दावी छ । मुल शीर्षकहरु मात्रै राखि बजेट पारित गरिएकाले त्यसको ब्रेक डाउन गरी सुत्रमा राख्न ढिला भएको हुन सक्ने उनको अनुमान छ ।
गाउँपालिका अध्यक्ष थामी तथा केही वडाध्यक्षहरुले बजेट पारित भएको दावी गरे पनि कार्यालयमा भने बजेट पास भएको माइन्युट बुधबारसम्म प्राप्त नभएको प्रमुख प्रशासकिय अधिकृत नवराज ओलीले बताए । विनियोजन ऐन पारित भइ सुत्रमा इन्ट्री नगरेसम्म खर्च गर्न नपाइने कानुनी प्रावधान भएकोले दैनिक प्रशासन चलाउन समेत संकट परेको उनको भनाइ छ । तर तलब भत्ता खुवाउने समयसम्म सुत्रमा बजेट इन्ट्री गर्ने काम सकिने भएकोले कुनै समस्या नहुने गाउँपालिका अध्यक्ष थामीको भनाइ छ ।
प्रतिक्रिया दिनुहोस !
