किट अभावमा बीपीमा पीसीआर बन्द, बिरामीको शल्यक्रिया रोकियो
असोज ८, २०७७ बिहीबार १२:५३:०
धरान : कोरोना भाइरस संक्रमण परीक्षण किट अभावका कारण प्रदेश १ को बीपी कोइराला स्वास्थ्य विज्ञान प्रतिष्ठानमा पीसीआर परीक्षण बन्द भएको छ । संघीय सरकार र प्रदेश सरकारले पीसीआर परीक्षणमा आवश्यक किट उपलब्ध नगराएका कारण प्रतिष्ठानमा गरिँदै आएको पीसीआर परीक्षण तीन दिनदेखि बन्द भएको छ ।
पीसीआर परीक्षण नहुँदा प्रतिष्ठानमा उपचाररत बिरामीको शल्यक्रिया समेत रोकिएको छ । सिकिस्त बिरामीको शल्यक्रिया रोकिएपछि बिरामीको ज्यान जोखिममा परेको भन्दै पीडितले तत्काल पीसीआर परीक्षण गर्न र शल्यक्रिया सेवा सुचारु गर्न सरकारसँग माग गरेका छन् ।
प्रतिष्ठानको आकस्मिक कक्ष, शल्यक्रिया, हाडजोर्नी , प्रसूति वार्ड, बच्चा वार्डलगायतका वार्डमा भर्ना भएका बिरामीको शल्यक्रिया रोकिएको छ । प्रतिष्ठानमा पीसीआर परीक्षण रोकिएपछि दुर्घटनामा परेका र इमेरजेन्सी शल्यक्रिया गर्नुपर्ने बिरामी बढी जोखिममा परेका छन् ।
प्रतिष्ठानमा भर्ना भएका सयौं बिरामीको पीसीआर परीक्षण नभएका कारण शल्यक्रिया हुन नसकेको प्रतिष्ठानको हाडजोर्नी विभागका प्रमुख डा. पसुपती चौधरीले बताए । उनले शल्यक्रिया गर्न प्रतिष्ठान भर्ना भएका बिरामीको अनिवार्य पीसीआर रिपोर्टलाई अनिवार्य गरेको बताए । डा. चौधरीले पीसीआर परीक्षण नभएकै कारण प्रतिष्ठानको हाडजोर्नी विभाग र आकस्मिक कक्षमा भर्ना भएका दर्जनौं बिरामीको शल्यक्रिया रोकिएको जानकारी दिए । 
शल्यक्रिया नहुने भएपछि प्रतिष्ठानबाट घर फर्किँदै संखुवासभाको सभापोखरी गाउँपालिकाकी प्रभा लिम्बू । तस्बिर : रत्नप्रसाद आचार्य
पीसीआर परीक्षण नभएका कारण प्रतिष्ठानको प्रसूति वार्डमा भर्ना भएका महिलाको समेत शल्यक्रिया रोकिएको प्रतिष्ठानको युनिट १ का इन्चार्ज डा. रोहित रिजालले बताए । प्रतिष्ठानमा पत्थरीको शल्यक्रिया गर्न आएकी संखुवासभा सभापोखरी गाउँपालिकाकी २६ वर्षीय प्रभा लिम्बूले पनि पीसीआर परीक्षण नभएका कारण आफ्नो पनि शल्यक्रिया रोकिएको गुनासो गरिन् ।
उनले तत्काल पीसीआर परीक्षण गरी शल्यक्रिया गर्ने वातारण मिलाइ दिन सरकारसँग माग गरेकी छिन् । प्रतिष्ठानका प्रवक्ता डा. निदेश सापकोटाले संघीय सरकार र प्रदेश सरकारले किट नपठाएका कारण पीसीआर परीक्षण बन्द भएको र शल्यक्रिया समेत प्रभावित भएको बताएका छन् ।
उनले प्रतिष्ठानमा किट अभाव भएपछि तत्काल उपलब्ध गराउन स्वास्थ्य मन्त्रालयसँग माग गरिएको भएपनि उपलब्ध नभएको बताएका छन् । प्रतिष्ठानका निर्देशक डा. गौरीशंकर साहले निःशुल्क गरिँदै आएको पीसीआर परीक्षण बन्द गरिएको र किट उपलब्ध भएपछि प्रति व्यक्ति २ हजार शुल्क लिएर मात्र परीक्षण गर्ने जानकारी दिए।
प्रतिक्रिया दिनुहोस !
