विराटनगर : विराटनगरबाट ठुलो रकमको जुवा वा सट्टेबाजी खेलाउनमा संलग्न तीन जनालाई प्रहरीले पक्राउ गरेको छ। यूएईमा जारी इण्डियन प्रिमियर लिग (आईपीएल) क्रिकेटमा ठुलो रकम राखी सट्टेबाजी खेल खेलाएको आरोपमा विराटनगर १५ का ३८ वर्षीय मुन्ना भन्ने सत्यजित साह, ३८ वर्षीय बैजनाथ साह र विराटनगर १७ का ४२ वर्षीय जगदिश साहलाई प्रहरीले पक्राउ गरेको हो।
आईपीएल क्रिकेटमा सट्टेबाजीको कारोबार गर्ने गरेको विशेष सूचनाका आधारमा उनीहरुलाई पक्राउ गरेको १ नम्बर प्रदेश प्रहरी कार्यालय विराटनगरका सूचना समन्वय अधिकृत तथा प्रहरी प्रवक्ता कबिन्द्र कुमार कार्कीले जानकारी दिए।
मंगलबार राती पक्राउ परेका उनीहरुको साथबाट नगद ६० हजार रुपैयाँ, १ थान ल्याप्टप, ३ थान मोबाईल र १ थान मोटरसाईकल समेत बरामद गरिएको जिल्ला प्रहरी कार्यालय मोरङले जनाएको छ।
उनीहरुले अनलाइनबाट कुन टिमको हारजित हुन्छ भनि बाजी मार्नका लागी रकम कबोल गराई सट्टेबाजी खेल खेलाउने गरेको अनुसन्धानबाट खुलेको प्रहरी प्रवक्ता कबिन्द्र कुमार कार्कीले बताए।
प्रतिक्रिया दिनुहोस !
