इवामुरा अस्पतालको लापरबाही ! मृत घोषणा गरिएका व्यक्तिको उपचार नर्भिकमा

भक्तपुर : भक्तपुरको सल्लाघारीस्थित डा. इवामुरा मेमोरियल अस्पतालले उपचारमा लापरवाही गर्दा एक पुरुषको ज्यान जोखिममा परेको छ।

इवामुराले मृत घोषणा गरेका बिरामीको उपचार नर्भिक अस्पतालको भेन्टिलेटरमा भइरहेको छ। रगतको प्रवाह रोकिएका कारण मस्तिष्कमा क्षति पुगेकाले बिरामी कोमाको अवस्थमा पुगेको बताइएको छ।

भक्तपुर नगरपालिका ७ चोर्चा निवासी ४७ वर्षीय लक्ष्मीकुमार लाखाजूको ज्यान जोखिममा परेको हो। उनी गत शुक्रबार घरैबाट हिंडेर इन्डोस्कोपी गर्न अस्पताल पुगेका थिए। घाँटी दुःखेर इन्डोस्कोपी गर्न गएका उनको मृत्यु भएको भन्दै इवामुरा अस्पतालले घोषणा गरेको उनको परिवारले जनाएको छ।

बिरामी लक्ष्मीकुमारका भाइ बिजेशले इवामुरा अस्पतालको मृत्यु घोषणा गरेपछि विश्वास नलागेर पुनः काठमाडौंको थापाथलीस्थित नर्भिक अस्पताल लगिएको जानकारी दिए।

नर्भिक अस्पतालका चिकित्सकहरुले दाजुको मृत्यु भइनसकेका बताएपछि भेन्टिलेटरमा राखेर उपचार भइरहेको बिजेशले सुनाए। उनका अनुसार इवामुराले बुधबार दाजुको मृत्यु भएको घोषणा गरेका थिए। लगत्तै बुधबार नै नर्भिक लगिएको थियो।

‘नर्भिक अस्पतालले रगतको प्रवाह रोकिएका कारण मस्तिष्कमा क्षति पुगेकाले बिरामी बाँच्ने नबाँच्ने अहिल्यै भन्न नसकिएको जनाएको छ’, भाइ बिजेशले भने।

यसैबीच अस्पतालमा गएका व्यक्तिको उपचारमा लापरबाही गरिएको भन्दै बिहीबार इवामुरा अस्पतालमा पीडित बिरामीका आफन्तले घेराउ गरेका छन्। पीडित बिरामीको उपचारको सम्पूर्ण खर्च व्यहोर्न र क्षतिपूर्ति दिन माग गर्दै विरोध प्रदर्शन गरेका थिए।

इवामुरा अस्पतालले भने घटनाबारे कुनै जानकारी दिएको छैन। उपचारमा लापरबाही भएको हो होइन वा अरु के भएको भन्नेबारे जानकारी लिन अस्पतालका प्रवन्धक रञ्जित मारिखूसँग पटकपटक सम्पर्क गर्दा पनि उनी सम्पर्कमा आएनन्।

बिरामीको उपचार खर्च अस्पतालले व्यहोर्ने
पीडित व्यक्तिका घरपरिवार, आफन्त र स्थानीयले अस्पताल घेराउ गर्दै विरोध प्रदर्शनपछि बिहीबार नै दुईपक्षीय सहमति भएको छ। महानगरीय प्रहरी परिसर भक्तपुरकी प्रमुख प्रहरी उपरीक्षक तारादेवी थापाले पनि पीडित परिवार र अस्पतलाबीच सहमति भएको पुष्टि गरे।

सहमतिअनुसार बिरामी लक्ष्मीकुमारको उपचारमा लाग्ने सम्पूर्ण खर्च इवामुरा अस्पतालले व्यहोर्ने भएको बिजेशले जानकारी दिए। उनका अनुसार दाजु लक्ष्मीकुमारको इवामुरा र नर्भिक अस्पतालमा उपचार गर्दा लाग्ने सम्पूर्ण खर्च इवामुरा अस्पतालले व्यहोर्ने सहमति भएको हो। सहमतिसँगै अस्पतालमा बिरामीका घरपरिवार, आफन्त तथा सर्वसाधारणले गरेको विरोध प्रदर्शन स्थगित भएको छ।
लक्ष्मीकुमार पेसाले सिकर्मी हुन्। भक्तपुर नपा ९ च्याम्हासिंहमा उनले सञ्चालन गर्ने फर्निचरले उनको घरपरिवारको जिविका चल्दै आएको छ।