ओखलढुंगा-रापुर सडक : म्याद सकिन चार दिन मात्रै बाँकी, सुरु भयो कालोपत्रे
असोज २६, २०७७ सोमबार १२:१५:०
ओखलढुंगाः म्याद सकिन चार दिन बाँकी हुँदा सदरमुकाम ओखलढुंगादेखि रामपुर–लप्सेखोला सडकमा डीबीएसटी कालोपत्रे गर्न थालिएको छ । सदरमुकामको नयाँबजारबाट सडकमा कालोपत्रेको प्राइमकोट बिछ्याउने काम सुरु गरिएको हो ।
यो आयोजनाको म्याद यही असोज २९ गतेसम्म रहेको छ । पटकपटक म्याद थपेको उक्त आयोजना ठेकेदारले काम नगर्दा समयमा नसकिएको हो । राष्ट्रिय पुनर्निर्माण प्राधिकरणको भूकम्प आपतकालीन सहायता आयोजनाअन्तर्गत निर्माण भइरहेको सो सडकको १६ किलोमिटर क्षेत्रमा कालोपत्रे गर्ने लक्ष्य लिइएको छ । २३ दशमलब ६२ किलोमिटर सडकमा ७ दशमलब ६२ किलोमिटर क्षेत्रमा ग्राभेल गर्ने प्राविधिक स्टिमेट रहेको छ ।
२०७५ असार २७ मा भ्याटसहित २९ करोड ९९ लाख ६० हजार १ सय ३ रुपैयाँ लागतमा सम्पन्न गर्नेगरी गौरी पार्वती निर्माण सेवा प्रालिले कालोपत्रे गर्ने कामको जिम्मा लिए पनि समयमै कालोपत्रेको काम सकेको थिएन । ठेक्का लागेको १८ महिनाभित्र सम्पन्न गर्ने सम्झौता भएपनि काम नसिकएपछि विभिन्न चरणमा समयसीमा थपिएको थियो ।
सडक चौडा बनाएर छाडिएपछि खसेको पहिरो र हिलोका कारण १६ किलोमिटर सडक पार गर्न २ घण्टा लाग्ने गरेको छ । पछिल्लो समयमा लकडाउन र भारी वर्षाको कारण देखाएर काम रोकिएको थियो । हिलाम्या सडक सुधार नगरेर ठेकेदारले बेश पुरा भएको ठाउँमा कालोपत्रे विच्छ्याएर म्याद थप्न काम देखाएको स्थानीयको गुनासो छ । निकै समस्या भएका ठाउँमा सुधार नगरी सरदमुकाम छेउमा काम देखिने भएकाले कालोपत्रेको कोट बिछ्याउन थालिएको स्थानीय सञ्जय खत्रीको आरोप छ ।
अहिले सो सडकमा कालोपत्रे गर्ने काम अगाडि बढाइएको राष्ट्रिय पुनर्निर्माण प्राधिकरण जिल्ला आयोजना कार्यान्वयन इकाइ (अनुदान व्यवस्थापन तथा स्थानीय पूर्वाधार) का इन्जिनयर सरोज केसीले बताए ।
हाल दसैंअघि नै सो सडकको ४ किलोमिटर क्षेत्रमा कालोपत्रे गर्ने तयारी गरिएको इन्जिनियर केसीको भनाइ छ । तयारी गरिएको क्षेत्रमा ग्राभेल बिछ्याउने र बेस कोर्ष तयारी गर्ने काम भएको उनले बताए ।
सडक कालोपत्रे गर्ने अन्तिम समयसीमा आउन केही दिन मात्रै बाँकी हुँदा सडक निर्माणको समयसीमा थप गर्नका लागि पहल भइरहेको कार्यालयको भनाइ छ । आउँदो मंसिरसम्म सडक निर्माणको काम नसकिए पुस माघमा चीसो बढ्ने र कालोपत्रे नबस्ने समस्याले चैतसम्मै पर्खनुपर्ने प्रावधिकहरु बताउँछन् ।
‘काम द्रूत गतिमा गराउनका लागि हामी तयारी छौँ, इन्जिनियर केसी भन्छन्, 'तर दसैं तिहारका कारण अत्यधिक गाडीहरु आवतजावत गर्ने भएकाले काम गर्न समस्या देखिएको छ ।'
प्रतिक्रिया दिनुहोस !
