राजविराज : सप्तरीको महादेवा गाउँपालिका–३ बथनाहा निवासी पूर्वमन्त्री डा. डम्बरनारायण यादवको ८६ वर्षको उमेरमा आइतबार निधन भएको छ। विराटनगरस्थित बिराट नर्सिङ्ग होममा उपचारको क्रममा यादवको निधन भएको उनका छोरा मनोज यादवले जानकारी दिए।
सप्तरीस्थित आफ्नो निवासमा चार दिनअघि अचानक बेहोस भएपछि उपचारका लागि उनलाई विराटनगरस्थित नर्सिङ्ग होममा भर्ना गरिएको थियो। काठमाडौंमा बसोबास गर्दै आएका यादव एक महिना अघि सप्तरीस्थित घरमा बस्दै आएका थिए। ब्रेन हेम्ब्रेजका कारण उनको निधन आइतबार बिहान पौने पाँच बजे भएको उनका भतिजा अजय यादवले बताए।
पूर्व मन्त्री डा. यादवको केही वर्षअघि मुटुको बाइपास सर्जरी गरिएको थियो। वि.स. २०३६ साल जेठ १८ गते जनमत संग्रह गराउने दायित्वसहित गठित प्रधानमन्त्री सूर्यबहादुर थापा नेतृत्वको मन्त्रीमण्डलमा यादव शिक्षा राज्यमन्त्री थिए। वीर अस्पतालका चिकित्सक डा. सुदीपकुमार भट्टाचार्यसँग तत्कालीन राज्यमन्त्री यादवको विवाद हुँदा यादवले पद छाडेका थिए।
विवादका क्रममा डा. भट्टाचार्यले ‘अलि राम्रो पेपरमा लेखेर दिन तपाईंको हैसियतलाई सुहाउँदैन’, भन्दै ट्वाइलेट पेपरमा राजीनामा लेखेर बुझाएपछि मन्त्री यादवले नैतिकताका आधारमा पद छाडेका थिए। वि.स. २०४० साल असार २९ गते लोकेन्द्रबहादुर चन्दको नेतृत्वमा स्वास्थ्य मन्त्री रहेका यादव प्रजातन्त्र आएपछि नेपाल सद्भावना पार्टीमा सक्रिय थिए। उनी मधेशी नागरिक समाजको अध्यक्षको हैसियतामा विभिन्न सामाजिक कार्यमा समेत संलग्न थिए।
उनको शवलाई बथनाहास्थित पैतृक गाउँमा आइतबार साँझ दाह संस्कार गरिने पारिवारिक श्रोतले जनाएको छ। यादवको एक छोरा र एक छोरी छन्। श्रीमतिको एक वर्षअघि नै मृत्यु भएको थियो।
प्रतिक्रिया दिनुहोस !
