भक्तपुर : भक्तपुरमा थप ६ जना कोरोना भाइरस संक्रमितको मृत्यु भएको छ । स्वास्थ्य कार्यालय भक्तपुरका अनुसार ४ महिला र २ पुरुष गरी ६ जना कोरोना भाइरस संक्रमितको मृत्यु भएको हो।
यससँगै भक्तपुरमा कोरोना भाइरस संक्रमणका कारण मृत्यु हुनेको संख्या ५३ पुगेको छ । यहाँका ३६ पुरुष र १७ महिलाको कोरोना भाइरस संक्रमणका कारण मृत्यु भएको हो ।
कार्यालयका प्रमुख कृष्ण मिजारले भक्तपुरका चार नपामध्ये सबैभन्दा बढी भक्तपुर नपाका १४ पुरुष र ८ महिला गरी २२ जना संक्रमितको मृत्यु भएको छ । यसपछि मध्यपुर थिमि नपाका १५ पुरुष र ५ महिला गरी २० जना संक्रमितको मृत्यु भएको उनले जानकारी दिए ।
त्यस्तै सूर्यविनायक नपाका ६ पुरुष र ४ महिला गरी १० जना तथा चाँगुनारायण नपाका एक पुरुष संक्रमितको मृत्यु भएको छ ।
भक्तपुरमा कोरोना भाइरस संक्रमणका कारण मृत्यु हुनेको संक्रमणदर १.१३ प्रतिशत रहेको छ । जुन समग्र नेपालको मृत्युदरभन्दा दोब्बर हो ।
संक्रमित पुगे ४ हजार ६ सय ९०
भक्तपुरमा कोरोना भाइरस संक्रमितको संख्या निरन्तर बढिरहेको छ । मंगलबार एकैदिन भक्तपुरमा एकसय ७३ जनामा कोरोना भाइरस संक्रमण पुष्टि भएको छ ।
यससँगै भक्तपुरमा कोरोना भाइरस संक्रमितको संख्या ४ हजार ६ सय ९० पुगेका छन् । जसमा २ हजार ६ सय ९३ जना पुरुष र एकहजार ९ सय ९७ जना महिला संक्रमित रहेका छन् ।
स्वास्थ्य कार्यालयका अनुसार मंगलबार भक्तपुरमा थप ९६ पुरुष र ७७ महिलामा कोरोना भाइरस संक्रमण पुष्टि भएको हो । जसमा सबैभन्दा बढी भक्तपुर नपाका २९ महिला र २९ पुरुष गरी ५८ जनामा संक्रमण भएको कार्यालयका प्रमुख मिजारले जानकारी दिए ।
त्यस्तै मध्यपुर थिमि नपाका ३१ पुरुष र २२ महिला गरी ५३ जना संक्रमण भएको छ ।
उनका अनुसार मंगलबार सूर्यविनायक नपामा २६ पुरुष र २० महिला गरी ४६ जना तथा चाँगुनारायण नपामा ५ पुरुष र ४ नपा गरी ९ जना नयाँ संक्रमित थपिएका छन् । ५ पुरुष र २ महिला गरी ७ संक्रमित भने सम्पर्कविहीन भएको उनले बताए ।
मंगलबारसम्म भक्तपुरमा एकहजार २ सय ४७ पुरुष र ८ सय ९० महिला गरी २ हजार एकसय ३७ सक्रिय संक्रमित रहेका छन् ।
‘जसमध्ये एकहजार ५ सय ६२ होम आइसोलेसनमा रहेका छन्’, प्रमुख मिजारले थपे, ‘५ सय ७५ जना संक्रमित भने अस्पतालको आइसोलेसनमा रहेका छन् ।’
उनका अनुसार भक्तपुरका एकहजार ४ सय १० जना पुरुष र एकहजार ९० जना महिला गरी २ हजार ५ सय संक्रमित डिस्चार्ज भएका छन् । जुन कुल संक्रमितको ५३.३० प्रतिशतमात्रै हो।
प्रतिक्रिया दिनुहोस !
